Mamandar sýburqaqtarda nelikten shomylýǵa bolmaıtynyn túsindirdi
«Fontandaǵy sý jıi jańartylmaıtynyn eskergen jón. Osyǵan baılanysty vırýstyq jáne parazıttik aýrýlardy juqtyrý qaýpi joǵary. Sondaı-aq, sýburqaqta qańǵybas ıtter men qustar shomylady, olar ártúrli ınfektsııalardyń qozdyrǵyshy bolýy múmkin. Onyń ústine, joǵary aýa temperatýrasynda sýdaǵy mıkroorganızmder tez kóbeıedi. Sondyqtan, sýburqaqta shomylý sýyq tııý qaýpimen ǵana emes, ótkir ishek ınfektsııasyna nemese konıýnktıvıtke de aınalýy yqtımal. Enterovırýstyq jáne rotavırýstyq ınfektsııalar, A vırýstyq gepatıti úlken qaýip tóndiredi», - delingen málimdemede.
Sanıtarııalyq-epıdemıologııalyq baqylaý departamenti mamyrdan qyrkúıekke deıin synamalar ala otyryp, sýburqaqtardaǵy sý sapasyna monıtorıng júrgizedi. Zerthanalyq zertteýlerdiń nátıjeleri boıynsha sáıkessizdikter anyqtalǵan.
«Atap aıtqanda, Baıqońyr jáne Saryarqa aýdandarynda ornalasqan (»Jastar« saraıynyń janyndaǵy, «Esil« SÚ aýdanynda, sondaı-aq Pýshkın gúlzary jáne Abaı dańǵylynda) sýburqaqtar sýynda sanıtarlyq-hımııalyq kórsetkishter boıynsha buldyrlyqtyń ruqsat etilgen mánnen 1,1-1,7 ese artýy kórsetildi. Sondaı-aq, A. Moldaǵulova eskertkishi men «Jastar« teatry mańyndaǵy «Atyraý« sýburqaq keshenderiniń sýynda mıkrobıologııalyq kórsetkishter boıynsha sáıkessizdik anyqtaldy», - dep kórsetedi mamandar.
Sýburqaqta jaraqat alý qaýpi de joǵary. Osyǵan baılanysty, astanalyq SEBD ata-analardy balalarǵa qaýipsizdik jáne jeke bas gıgıenasyn saqtaý erejelerin túsindirýge shaqyrady.
«Eshbir jaǵdaıda balalardy qaraýsyz qaldyrmańyz jáne olarǵa kún saıyn shomylýǵa tyıym salynǵan jerlerde sýǵa túsý óte qaýipti ekenin eskertińiz», - deıdi departament ókilderi.
