Mamandar oqýshylardyń durys tamaqtanýynyń perspektıvalyq mázirin ázirledi

ASTANA. KAZINFORM -  Mektepte durys tamaqtanýdy qamtamasyz etý maqsatynda Sanıtarııalyq-epıdemıologııalyq baqylaý komıteti jetekshi beıindi sarapshylarmen birlesip bilim berý uıymdaryna arnalǵan Úlgilik perspektıvalyq mázirdi ázirledi.

Mázir qaýipsiz, teńdestirilgen jáne ǵylymı negizdelgen, balalardyń fızıologııalyq qajettilikteri men kalorııasyn eskere otyryp jasalǵan, onda jas erekshelik sanattary, maýsymdylyǵy, sondaı-aq as blogy joq mektepterdegi balalardyń tamaqtanýy eskerilgen.

- Mázirde DDU-nyń semizdik, qant dıabeti, júrek-qan tamyrlary jáne basqa da aýrýlardyń damý qaýpin azaıtý úshin qant pen tuzdy azaıtý boıynsha usynystary eskerilgen. Mysaly, balalar táýlik boıy bolatyn uıymdar úshin qant mólsheri 6-10 jas erekshelik tobynda – 55 g-nan 15 g-ǵa deıin, 11-14 jas erekshelik tobynda – 70 g-nan 21 g-ǵa deıin, ıaǵnı 3,3-3,6 ese azaıdy. Tuz 6-10 jas erekshelik tobynda – 15 g-nan 3 g-ǵa deıin, 11-14 jas erekshelik tobynda – 15 g-nan 4,5 g-ǵa deıin, ıaǵnı 3,3-5 ese azaıdy, - dep jazdy komıtetten.

Aqparatqa qaraǵanda, negizgi mázirge et, balyq jáne kókónis taǵamdary, jańa pisken kókónisten jasalǵan salattar jáne qant mólsheri az sýsyndar kiredi.

Balalardyń ósýi men damýy, sondaı-aq aýrýlardyń aldyn alý úshin ratsıonǵa maıy az sút, probıotıkteri bar sút qyshqyly ónimderi kiredi jáne kókónister men jemisterdiń kólemi arttyrylǵan.

Aıta keteıik, Atyraý oblysynda ata-analar balasynyń mektep ashanasynan tamaq ishken-ishpegenin bilip otyrady.