Mamandar Naýryz merekesinde tamaqtan ýlanyp qalmaýdyń joldaryn aıtty

ASTANA. QazAqparat - QR Densaýlyq saqtaý mınıstrliginiń Qoǵamdyq densaýlyq saqtaý komıteti Naýryz merekesi qarsańynda tamaqtan ýlanyp qalmaýdyń joldary týraly aıtty, dep habarlaıdy QazAqparat.

Merekelik dastarqandy tamaqtan ýlaný oqıǵasy buzýy múmkin. Osyǵan baılanysty, mereke kúnderinde tamaqtan ýlanýdyń aldyn alý úshin demalysta mynadaı qaǵıdalardy saqtaý usynylady.

Merekelik ústelgen taǵamdar daıyndaý kezinde olardy saqtaý jáne paıdalaný merzimin saqtańyzdar, shıki jáne daıyn taǵamdardy birge saqtaýǵa jol bermeńizder, al sapasyzdyqqa azdaǵan kúdik paıda bolǵanda, ásirese ótken keshtegi ústelden qalǵan taǵamdardy paıdalanbaý kerek. Jeke gıgıena qaǵıdalaryn jáne tazalyqty saqtańyzdar.

Qus etinen jasalǵan, jumyrtqa qosylǵan daıyn taǵamdar, maıonez jáne qaımaq qosylǵan salattar, kremi bar kondıterlik ónimder (torttar, bálishter) barynsha úlken qaýip tóndiredi.

Ádette qoǵamdyq tamaqtaný jáne saýda obektileri mereke kúnderi aspazdyq jáne kremi bar kondıterlik ónimderdi úlken mólsherde daıyndaıdy. Osy kúnderi saqtaý jáne satý merzimi qysqa túrli salattar, et jáne balyqtan daıyndalǵan tiske basarlar, et silikpeleri, quıma etter, taýyq etinen jasalǵan taǵamdar jáne basqalary eń kóp suranysqa ıe bolady.

Osyǵan baılanysty, tamaq óniminiń qaýipsizdigin jáne sapasyn rastaıtyn qujattardyń bolýyna, sondaı-aq olardy satý jáne saqtaý jaǵdaılaryna nazar aýdarýdy suraımyz.

Sondaı-aq meıramhanalar jáne dámhanalar basshylarynyń nazaryn Naýryz meıramy kúnderi tamaqtan ýlanýdyń aldyn alý máselelerine kóńil aýdaramyz.

«Jalpy respýblıkalyq is-sharalardy ótkizýge belsendi qatysqany úshin jáne osymen bir mezgilde tamaqtan ýlaný men ishek ınfektsııalarynyń aldyn alý úshin qajetti sanıtarlyq erejelerdiń oryndalýyn suraımyz», - delingen komıtettiń habarlamasynda.