Mamandar kókshetaýlyq shujyqqa qus qaýyrsyny qalaı túskenin anyqtady
ASTANA. QazAqparat - Quramynda qus qaýyrsyny anyqtalǵan shujyq ónimderin óndirý toqtatyldy, dep xabarlaıdy QazAqparat tilshisi QR Ulttyq ekonomıka mınıstrligi tutynýshylar quqyqtaryn qorǵaý komıtetiniń baspasóz qyzmetine silteme jasap.
Atalǵan fakt boıynsha Astana qalasy Tutynýshylardyń quqyqtaryn qorǵaý departamentteriniń mamandary «Mıasnye vremena» shujyq ónimderin óndirýshi «Prod Company «Pyarn» JShS-ǵa jospardan tys tekserý júrgizdi.
"Tekserý barysynda óndirý tehnologııasyn óreskel buzý faktileri anyqtaldy. Shıkizatty daıyndaý tsehy bolmaǵandyqtan, etti aldyn ala tazartpaǵan jáne jýmaǵan. Osynyń nátıjesinde ónimde qaýyrsyn túrinde bóten qosyndylar bolǵan. Budan basqa, shıkizatqa jáne daıyn ónimge óndiristik baqylaý uıymdastyrylmaǵan, osynyń saldarynan kelip túsken shıkizattyń bir bóliginde onyń qaýipsizdigi men sapasyn rastaıtyn qujattar joq. Óndiristen alynǵan «Prod Company «Pyarn» JShS-nyń shujyq ónimderine júrgizilgen zerthanalyq saraptama nátıjeleri onda qaýyrsyndardyń bar ekendigin rastady", - delingen resmı xabarlamada.
Kásipkerlik nysan shaǵyn bızneske jatady. Al Kásipkerlik kodekske sáıkes, úsh jyldyń ishinde oǵan jalpyǵa ortaq tekseris ótkizýge ruqsat joq. Osy jolǵy tekserý kezinde kásipkerdiń jumys istep turǵan úı-jaıdy qaıta jobalap, sýmen jabdyqtaý jáne sý burýdyń bolmaýy kezinde alańy 130 sharshy metr bolatyn qosymsha óndiris úı-jaıyn paıdalanýǵa engizgeni anyqtaldy. Sonyń saldarynan burynǵy tehnologııalyq protsess buzyldy. Oǵan qosa, óndiristi keńeıtý jumystary ýákiletti organnyń kelisiminsiz júrgizilgen.
"Anyqtalǵan zań buzýshylyqtar úshin kásipkerge aıyppul salyndy. «Prod Company «Pyarn» JShS-nyń dırektoryna eskertýlerdi joıý týraly nusqaý berildi. Nysandy sanıtarlyq talaptarǵa saı keltirmeıinshe onyń jumysy toqtatylyp otyr. Tutynýshylar quqyqtaryn qorǵaý komıteti sapasyz ónimdi anyqtaǵan tutynýshyǵa onyń belsendi azamattyq ustanymy úshin alǵys bildiredi", - dep xabarlady komıtet.
