Qyrǵyzstan taýlaryndaǵy reseılik alpınısti qutqarý múmkin emes - sarapshylar
ASTANA.KAZINFORM – «Aq-Saı Trevel» týrıstik kompanııasy shaqyrǵan alpınısterden quralǵan sarapshylar toby 12 tamyzdan beri aıaǵynan jaraqat alyp, Pobeda shyńynda jatqan reseılik Natalıa Nagovıtsynany qutqarý múmkin emes ekenin málimdedi, dep habarlaıdy Kazinform agenttiginiń menshikti tilshisi.
Málimdemede Pobeda shyńynda ırandyq alpınıster Pılehvarı Marıam Abolhasan jáne Mashhadıagalý Hasan Seıfollamen baılanystyń úzilýine, Reseı azamaty Natalıa Nagovıtsynanyń aıaǵynan jaraqat alýyna jáne ıtalııalyq alpınıst Lýka Sınıgalıanyń densaýlyǵynyń nasharlaýyna baılanysty (keıinirek qaıtys boldy) alǵashqy aqparat túskennen beri izdeý-qutqarý operatsııalaryna qatysqan tulǵalarmen kún saıyn brıfıng ótkizilgeni aıtylǵan.
Qyrǵyzstanda jáne shetelde ornalasqan, osyndaı operatsııalardy júrgizý tájirıbesi men tıisti daıyndyqtan ótken, onyń ishinde klımattyq beıimdelýden ótken, quramyna 20 maman kiretin alpınıster keńesi bıylǵy maýsymda izdeý-qutqarý jumystaryn júrgizý múmkin emes ekenin málimdedi.
— Qutqarýshylardyń ómiri men densaýlyǵyna tóngen barlyq qaýipti salystyra kele, aýa raıynyń kúrdeli jaǵdaıyn eskere otyryp, biz bıylǵy maýsymda izdeý-qutqarý jumystaryn júrgizý múmkin emes degen qorytyndyǵa keldik. Qutqarý jumystaryn odan ári uıymdastyrý, ókinishke qaraı, zardap shekkenderdiń odan beter kóbeıýine ákelýi múmkin, - delingen málimdemede.
Týrıstik kompanııa 2025 jyldyń tamyzynda Pobeda shyńynda júrgizilgen qutqarý operatsııasy Ortalyq Azııa tarıhyndaǵy eń qıyn operatsııalardyń biri bolǵanyn atap ótti. Oǵan Qyrǵyzstannan jáne sheteldik alpınıster men mamandar qatysty.
– Qatysýshylardyń erlikteri men jankeshtiligine qaramastan, aýa raıynyń qolaısyzdyǵy keıbireýlerin ǵana qutqarýǵa múmkindik berdi. «Aq-Saı Trevel» qaza bolǵandardyń týystaryna qaıǵyryp kóńil aıtady jáne adam ómiri úshin sońyna deıin kúreskenderge alǵysyn bildiredi, - dep túsindirdi kompanııa.
Aıta keteıik, 12 tamyzdan beri aıaǵy synǵan reseılik alpınıst Natalıa Nagovıtsyna 7 myń metrden astam bıiktiktegi Pobeda shyńynda kómek kútip jatyr. Odan sál tómen jaraqat alǵan reseılik áıeldi Pobeda shyńynan alyp ótpek bolǵan ıtalııalyq alpınıstiń denesi jatyr.
23 tamyzda Qyrǵyz Respýblıkasy Tótenshe jaǵdaılar mınıstrliginiń qutqarýshylary aýa raıynyń nasharlaýyna baılanysty Reseı azamaty Natalıa Nagovıtsynany izdeýdi toqtatty.
Keıinnen belgili bolǵandaı, aýa raıynyń kúrt nasharlaýyna baılanysty Qyrǵyzstan TJM «Eırbas N-125» tikushaǵy 24 tamyzda Ystyqkól oblysyna jiberilgen alpınıstti evakýatsııalaý operatsııasyn toqtatyp, turaqty mekenine oraldy.
27 tamyzda Qyrǵyz Respýblıkasynyń Ulttyq qaýipsizdik memlekettik komıteti joǵary dáldiktegi jabdyqpen jabdyqtalǵan ushqyshsyz ushatyn apparattardy paıdalana otyryp júrgizgen aerofototúsirilim alpınıst N.Nagovıtsynanyń turǵan jerinde tirshilik belgileri joq ekenin anyqtady.