Mamandar qarbyzdy tamyzǵa deıin jemeýge keńes beredi

Bul týraly astana.kz saıtyna Astana qalasynyń Tutynýshylardyń quqyqtaryn qorǵaý departamentinen habarlady. «Eń jyldam» pisetin suryptardyń ózi shilde aıynyń sońyna qaraı pisedi. Sondyqtan qarbyzdardy jeýdiń qolaıly ýaqyty - tamyz ben shilde aılary.

Departament qyzmetkerleriniń aıtýynsha, qarbyz ben qaýyndardy tańdaý kezinde qatelespes úshin eń birinshi nege kóńil aýdarý qajettigin bilý kerek: Zańsyz uıymdastyrylǵan bazarlarda saýda jasamaý; Baqshalyq daqyldardy satýǵa arnalǵan oryn qorshalǵan jáne kún sáýlesinen, jaýyn-shashynnan qorǵalýy tıis; satý orny shatyr astynda ornalasýy kerek; qarbyzdar bıiktigi kem degende 20 sm arnaıy sórelerde saqtalýy qajet; Qarbyzdardy joldyń shetindegi saýda oryndarynan satyp alýǵa bolmaıdy, óıtkeni olarǵa avtokólik gazdarynyń quramynda bolatyn aýyr metaldar tez jınalady; Kesilgen qarbyzdardy satyp alýǵa bolmaıdy. Qarbyzdy pyshaqpen kesken kezde onyń syrtqy betindegi las zattar qarbyzdyń ishki jumsaǵyna ońaı ótedi; Qabyǵynyń bútindigine kóńil aýdaryńyz, ol syzatsyz, jaryqsyz, shuńqyrsyz bolý kerek; Qarbyzdardy tasymaldaý kezinde kóp laqtyrady, sodan paıda bolǵan shuńqyrlardaǵy qarbyzdyń jumsaǵy ashyp ketedi; Qarbyzdy keser aldynda ony aǵyndy sýmen jaqsylap jýý qajet; Kesilgen qarbyz nemese qaýyndy tońazytqyshta 1 táýlikten asyrmaı saqtaý kerek; Qarbyzdy qabyǵyna deıin jemeńiz, sebebi nıtrattardyń kóp mólsheri qabyǵyna jaqyn jáne túbirine qaraı jınalady; Satýshydan ónimniń qaýipsizdigin rastaıtyn qujattardy surańyz;

Qarbyzben ýlanýdyń birinshi belgileri: sharshaý, bastyń qatty aýyrýy, júrek aıný, qusý jáne ishtiń ótýi. Keıbir jaǵdaılarda dene qyzýy kóteriledi, dirildeý jáne býyndardyń syrqyraýy oryn alady.

Bir jasqa deıingi balalar ýlanýǵa beıim keledi. Bala emizetin analarǵa qarbyzdy baıqap jeý qajet.

Eger ýlanyp qalsańyz, tezdetip dárigerge qaralyńyz. Dáriger kelgenge deıin kóp mólsherde sý iship, qusýǵa tyrysý kerek.