Mamandar elimizdiń 3 oblysyndaǵy kópirlerdi teksermek

ASTANA. QazAqparat - Instıtýt mamandary Almaty, Jambyl jáne Túrkistan oblystaryndaǵy kópirlerdi tekseredi, dep habarlaıdy QazAqpara QR Indýstrııa jáne ınfraqurylymdyq damý mınıstrliginiń baspasóz qyzmetine silteme jasap.

Elimizdegi jasandy qurylystardyń biryńǵaı bazasyn qalyptastyrý úshin derekterdi jınaý jumystary bastaldy.

«QazjolǴZI» AQ mamandary Almaty, Jambyl jáne Túrkistan oblystaryndaǵy avtomobıl kópirleri men jol ótpelerin egjeı-tegjeıli tekserýge kiristi. Jobany ınstıtýttyń avtojoldar men kópir qurylystaryn dıagnostıkalaý bólimi júrgizedi.

«Kópirlerdi zertteý ­- bul kóp ýaqytty qajet etetin ári qurylymnyń fızıkalyq jáne kerneýli-deformatsııalanǵan jaǵdaıyn zertteý úshin qajet ınjenerlik-tehnıkalyq sharalar kesheni. Zertteý kópirdiń naqty mólsherin, jer tóseminiń jaı-kúıin jáne qurylymdardyń barlyq elementin anyqtaý úshin qajet», dep atap ótti «QazjolǴZI» AQ Avtomobıl joldary men kópir qurylystaryn dıagnostıkalaý bóliminiń basshysy Ashat Baıbatyrov.

Kópir qurylystary týraly alynǵan derekter kópir qurylystaryn paıdalanýdy basqarý júıesi boıynsha tsıfrlyq baǵdarlamaǵa engiziletin bolady. Jınalǵan aqparatty sarapshylar kópirlerdi jobalaý, salý jáne jóndeý kezinde eskeretin bolady.

«Jınalǵan aqparat kópir qurylystaryn paıdalanýdy basqarý boıynsha baǵdarlamalyq qamtamasyz etý júıesine engiziledi. Alynǵan málimetter negizinde odan ári paıdalaný rejımi, barlyq kópir qurylysyn jóndeý, rekonstrýktsııalaý nemese aýystyrý qajettiligi týraly qorytyndy beriledi», dedi Ashat Baıbatyrov.

Esterińizge sala keteıik, Qazaqstanda 2 myńnan astam kópir qurylymdary bar. Sarapshylardyń pikirinshe, olar ár 5 jyl saıyn, al eski nysandar – ár 3 jyl saıyn dıagnostıkadan ótýi kerek. 60 jyldan astam jumys barysynda «QazjolǴZI» AQ myńdaǵan nysandardy dıagnostıkadan ótkizdi.