Mamandar eginniń bitik shyǵýy úshin jazdyq bıdaıdy 18 mamyrdan bastap egýdi quptaıdy
ASTANA. 5 naýryz. QazAqparat - Byltyr kúzden bergi jaýyn-shashynnyń, qardyń moldyǵyna qarap, «QazAgroInnovatsııa» AQ mamandary bıylǵy jyly eginniń bitik bolatynyn boljaıdy. Bul týraly búgin Aýyl sharýashylyǵy mınıstrliginde ótken brıfıng barysynda málim boldy.
Máselen, sala mamandarynyń aıtýynsha, byltyrdyń qyrkúıek, qazan aılarynda jáne qarashanyń bas kezinde jaýǵan jaýyn-shashyn egini jınap alynǵan egistik jerdiń topyraǵyna 37-53 mm-ge deıingi tereńdikte ylǵaldy molaıta túsken. Kúzde jáne qys basynda elimizdiń birqatar basym aımaqtarynda jaýyn-shashyn ádettegi normadan da artyq jaýǵan. Degenmen, kúzgi-jaýyn-shashyn men qardyń túsýi árqashan bitik eginge kepil bola almaıtyny belgili. Onyń ústine, Aqmola, Qostanaı oblystarynda, elimizdiń ortalyq jáne shyǵys óńirlerinde naýryz aıynyń bas kezinde jaýǵan jańbyr men qardyń tyǵyzdalýyna, jyldam erip ketýine yqpal etip, topyraqta ylǵaldyń mol jınalýyna keri áserin tıgizgen. Soǵan qaramastan, respýblıkamyzdyń eginshilikpen aınalysatyn aýdandarynda kóktemniń bas kezinde topyraqtyń ylǵaldanýy úshin qolaıly jaǵdaılar qalyptasqanyn mamandar alǵa tartady. Sony eskere otyryp, ǵalymdar pisip-jetilý kezeńi ortasha-kesheýildi jazdyq bıdaı suryptaryn mamyrdyń 18-23-i aralyǵynda, al ortasha suryptaryn mamyrdyń 20-26-sy aralyǵynda, erte pisetin suryptardy 23-30 mamyr aralyǵynda sebýge keńes beredi. «Búgingi tańda baıqalyp otyrǵan aýa raıynyń jaǵdaıy 1972 jáne 1979 jyldardaǵy aýa raıymen qatty uqsas. Dál sol jyldary jınalǵan egin ortasha jyldyq kórsetkish deńgeıinde jáne odan joǵary bolǵan edi», - deıdi «A. Baraev atyndaǵy egin sharýashylyǵynyń ǵylymı-óndiristik ortalyǵy» JShS Bas dırektory Jeksenbaı Qasqarbaev.
