Mamandar daýyl kezinde oqys jaǵdaıǵa tap bolmas úshin qandaı keńes beredi
ASTANA. QazAqparat - Astanadaǵy búgingideı daýyl soqqan jaǵdaıda oqys jaǵdaıǵa tap bolmas úshin mamandar qandaı keńes beredi. Bul jaıly elorda ákiminiń baspasóz hatshysy Elvıra Júrgenbaeva óziniń feısbýk paraqshasynda jazdy, dep habarlaıdy QazAqparat tilshisi.
«Jaısyz aýa raıy (daýyl kezinde - avt.) mamandar halyqty kelesi aldyn alý sharalaryn ustanýdy eskertedi. Naqtyraq aıtqanda, qatty jel soqqan jaǵdaıda úıde nemese páterde terezeni nyqtap turyp jabý kerek. Sonymen birge, tereze salynbaǵan balkonnan nemese lodjıdan qatty jel kezinde syrtqa ushyp ketýi yqtımal barlyq zattardy úıge kirgizgen abzal», - delingen habarlamada.
Al eger daýyl soqqan jaǵdaıda syrtta bolsańyz, jarnama taqtashalarynan, ózge de ilinip turǵan qurylymdardan, elektr jelilerinen, aǵashtardan qashyqta júrgen durys. Qaıǵyly jaǵdaıdan saqtaný úshin barynsha qyraǵy bolǵan abzal. Buǵan qosa úzilgen symdarǵa nemese shaıqalaqtaǵan zattarǵa jaqyn júrmeý kerek.
Qatty jel soqqan jaǵdaıda jaqynda ornalasqan ǵımarattardyń birinde (dúken, kitaphana, saýda ortalyǵy, úıdiń podezi, kınoteatr) saýǵalaǵan durys. Jel basylǵansha sol jerden shyqpaý qajet.
Sonymen birge, mamandar aǵashqa jaqyn kólikti qaldyrýǵa bolmaıtynyn eskertedi. Ásirese, shirigen nemese jalǵyz ósken aǵashtardan aýlaq júrgen abzal.
Eske sala ketsek, Astanada búgin qatty daýyl soǵyp, burshaq aralas jańbyr jaýdy. Osynyń saldarynan Túrkistan kóshesindegi qurylys alańyndaǵy kran men Beıbitshilik jáne Kelisim saraıy ǵımaratynyń keramogranıti qulap, Arnasaı 127 kóshesindegi turǵyn úıdiń, № 24 orta mekteptiń, Úrker shaǵynaýdanyndaǵy E- 638 kóshesindegi №91 balabaqsha shatyry ushyp ketken. Sonymen qatar, 13 adam jedel járdem qyzmetin shaqyrtqan.
