Mamandar aýyl sharýashylyǵy sanaǵy aıasynda 70 qalanyń úı sharýashyǵyn aldyn ala aralaıdy

ASTANA. KAZINFORM — Aýyl sharýashylyǵy sanaǵy aıasynda Qazaqstannyń 70 qalasynda úı sharýashylyqtaryn aldyn ala aralaý ótkiziledi. Bul týraly Ulttyq statıstıka bıýrosy málim etti.

Bıyl 1-30 maýsym aralyǵynda elimizdiń 70 qalasynda úı sharýashylyqtaryn aldyn ala aralaý (lıstıng) júrgiziledi. Bul kezeńde sanaq qyzmetkerleri tańdalǵan mekenjaılar boıynsha turǵyndardyń naqty turatynyn jáne jeke qosalqy sharýashylyq júrgizetindigin rastaý úshin negizgi saýalnamaǵa jatatyn úı sharýashylyqtarynyń tizimderin naqtylaıdy.

— Aýyl sharýashylyǵy sanaǵynyń negizgi kezeńi 2025 jyldyń 1 tamyzy men 20 qazany aralyǵynda ótedi. Oǵan zańdy tulǵalar, jeke kásipkerler, onyń ishinde mal sharýashylyǵymen, ósimdik sharýashylyǵymen jáne balyq ósirýmen aınalysatyn sharýa jáne fermer qojalyqtary, sondaı-aq jeke qosalqy sharýashylyǵy jer ýchaskeleri bar jáne (nemese) tórt túlik ustaıtyn úı sharýashylyqtary qatysady, — delingen habarlamada.

Onlaın kezeń 1-31 tamyz aralyǵynda sanaq.gov.kz portalynda ótedi, onda respondentter sanaq paraqtaryn óz betinshe toltyra alady. 20 qyrkúıekten 20 qazanǵa deıin — oflaın kezeń, ol kezde ıntervıýerler sanaqtan onlaın ótpegen úı sharýashylyqtaryna barady.

Eske sala keteıik, aýyl sharýashylyǵy sanaǵyn ótkizýge 3,7 mlrd teńge qarjy jumsalatynyn jazǵan edik.