Mamandar alaıaq týragentterden saqtanýdyń joldaryn aıtty
ASTANA. QazAqparat - Alaıaq týragentterdiń sany kóbeıip barady. Bul týraly «Týrıstik Qamqor» korporatıvti qorynyń baspasóz qyzmeti málim etti, dep habarlaıdy QazAqparat.
«Sońǵy kezderi alaıaq týragentterdiń sany kóbeıdi. Olar týrısterden joldamalardyń tolyq qunyn jınap alyp, aıaqasty joq bolyp ketýde. Onyń ústine shetelge demalýǵa shyqqan otandastarymyzdyń arasynda alaqol týroperatorlardyń áreketteriniń kesirinen qonaqúıge ornalasa almaı, elge qaıtýǵa bılettiń satyp alynbaý sekildi jaısyz oqıǵalaryna tap bolyp jatady. Sol sebepti «Týrıstik Qamqor» Qory shetelge shyqpas buryn, aldymen ózińiz toqtaıtyn qonaq úı bronyn, elge keri qaıtý bıleti men TÝRKOD-ty tekserip alýǵa keńes beredi», - delingen taratylǵan habarlamada.
TÝRKOD degen ne? Týrıstik kod 11-13 (shyǵatyn elge qatysty) qariptik-sandyq sımvoldardan turady. Ol ár joldamany resimdegen kezde avtomatty túrde beriledi. Týrıst kútpegen jaǵdaıǵa tap bolǵan kezde Qormen baılanysyp, óziniń týrkodynyń nómirin habarlaıdy jáne shuǵyl túrde 24 saǵattyń ishinde kómek kútýge quqyly.
«Týrkod jeke paraqpen nemese joldamaǵa jazylyp berilýi múmkin. Olaı bolmaǵan jaǵdaıda, týroperatordyń qyzmeti zańsyz dep tanylady jáne siz olardyń qyzmetine kúmánmen qarap, birden bas tartýǵa quqylysyz. Keleńsiz jaǵdaıǵa tap bola qalǵan jaǵdaıda, TÝRKOD sizdiń eń jaqyn ýaqyttaǵy reıspen elge aman-esen oralýyńyzdyń kepili. Týroperatorǵa týrıstik kodty Qor jarna men banktik kepildemeler tólengennen keıin ǵana beredi», - dep atap ótilgen «Týrıstik Qamqor» habarlamasynda.
Búgingi tańda «Týrıstik Qamqor» qorynyń quramyna 56 týroperator múshelikke engen. Olardyń tizimimen fondkamkor.kz saıtynda tanysýǵa bolady. Alaıda Qazaqstanda shetelge shyǵýmen aınalysatyn uzyn sany 140 kompanııa qyzmet etedi.
Aıta keteıik, Qazaqstanda 2016 jyldyń qarashasynda zańnamalyq deńgeıde Qazaqstan Respýblıkasyndaǵy shetelge shyǵý týrızmi aıasynda azamattardyń quqyqtaryna kepildik beretin «Týrıstik Qamqor» júıesi engizildi. Qordyń búkil jumys istegen ýaqytynda 507 myń qazaqstandyqtarǵa týrkod berildi.
