Mamandandyrylǵan sottar zııatkerlik menshikke qatysty daýlardy qarastyrýǵa múmkindik beredi - Halyqaralyq konferentsııa
ASTANA. Qarashanyń 11-i. QazAqparat /Jasulan Amanbaıuly/ - Búgin, sársenbide bastalǵan «Avtorlyq quqyq - 21 ǵasyr. Avtorlyq quqyq jáne ony qorǵaý máselelerin sheshýdegi TMD elderiniń áleýeti» atty ekikúndik halyqaralyq ǵylymı-tájirıbelik konferentsııanyń jumysynda zııatkerlik jáne avtorlyq quqyqty qorǵaý máselesi saralandy,
dep habarlaıdy QazAqparat.
Astanadaǵy QR Prezıdentiniń Memlekettik basqarý akademııasynda bas qosqan halyqaralyq sarapshylar, avtorlyq quqyqty qorǵaý salasy boıynsha aınalysatyn ǵalymdar, TMD-nyń sot qaýymdastyqtarynyń ókilderi, zııatkerlik quqyqty ıelenýshi iri kompanııalardyń basshylary ınnovatsııa men jańa tehnologııalar damyǵan 21-shi ǵasyrda avtorlyq quqyq pen aralas quqyqty qorǵaý salasyndaǵy bilimderimen almasýda jáne ony retteýdiń tıimdi joldaryn izdestirýde.
«Ǵalamtordyń ómirge etene kirigýi avtorlyq quqyqty qorǵaý salasynda halyqaralyq deńgeıdegi jańashyldyqtar men reformalardy qajet etedi. Bizdiń elde osyǵan oraı zııatkerlik menshikti qorǵaý ınstıtýttarynyń qalyptasýyna arnalǵan quqyqtyq saıasatty belsendi túrde júrgizip keledi. Sot tájirıbesi men zańnamalar jetildirilýde, Halyqaralyq aktiler ratıfıkatsııalanýda, sonymen qatar bedeldi halyqaralyq uıymdarmen áriptestik qatynastar ornatylýda», deıdi QR Joǵarǵy Sotynyń tóraǵasy Musabek Álimbekov.
M.Álimbekovtiń aıtýynsha, Qazaqstannyń quqyqtyq saıasatynyń tujyrymdamasy boıynsha mamandandyrylǵan sot tájirıbesin engizý josparlanǵan. «Qazirgi ýaqytta respýblıkada qylmystyq-azamattyq sottar, ekonomıkalyq jáne ákimshilik sottar, jasóspirimder isi jónindegi sottar, áskerı sottar bar. Endi tájirıbege salyqtyq sottar qurý, qalyptastyrý jumystary jasalýda. Mamandandyrylǵan salyqtyq sottar bizdiń elimizde zııatkerlik menshikke qatysty daýlardy qarastyrýǵa múmkindik beredi», degen ol, «ótkizilip otyrǵan konferentsııa atalmysh sot tájirıbesiniń minsiz negizin qurýǵa qajetti bilimdi jınaqtaýǵa arnalǵan dıalogtik alań bolatynyna» senim bildirdi.
Shara QR Joǵarǵy Sotynyń, QR Prezıdentiniń Memlekettik basqarý akademııasynyń, TMD qatysýshy elderiniń gýmanıtarlyq áriptestik jónindegi memleketaralyq qorynyń uıymdastyrýymen ótýde.
