Mamandandyrylǵan HQKO-da deldaldar áreketi tyıylmaı otyr - QR ІІM
«Іshki ister mınıstrliginiń málimetterine sáıkes, elimizdegi keıbir Mamandandyrylǵan halyqqa qyzmet kórsetý ortalyqtarynda halyqqa memlekettik qyzmet barysyndaǵy deldaldyq áreketterdiń oryn alý faktileri áli de bar. Olardy negizinen «Mamandandyrylǵan HQKO qyzmetkerleriniń kómekshisimin» dep tanystyratyn «ádepsiz» tulǵalar kórsetedi jáne azamattardan máselelerin jedel sheship beremin degen jeleýmen aqsha talap etedi. Osyǵan baılanysty ІІM Ózindik qaýipizdik departamenti atalǵan uıymdardaǵy mundaı tulǵalardyń zańsyz áreketin tyıýǵa baǵyttalǵan keń aýqymdy shara júrgizedi», - dedi resmı ókil.
Onyń dereginshe, osy jyldyń basynan beri elimizdiń 6 óńirinde deldaldar memlekettik qyzmet alýdy jedeldetý jeleýimen zańsyz aqshalaı syıaqy alǵan. Atap aıtqanda, 18 qańtarda Taldyqorǵanda joǵalǵan júrgizýshi kýáligin qaıta jasatý máselesin sheship beremin degen jeleýmen 15 myń teńge alǵan jergilik turǵyn ustaldy. Almatyda da kólik quralyn tirkeýden shyǵarý jáne tirkeýge kómektesý jeleýimen 50 myń teńge alǵan qala turǵyny qolǵa tústi. Al Pavlodarda júrgizýshi kýáligin kedergisiz alýǵa járdemdesý jeleýimen 30 myń teńge aqsha alǵan deldaldyń áreketi áshkerelendi.
«19 aqpanda Shymkent qalasyndaǵy Mamandandyrylǵan HQKO aýmaǵynda júrgizilgen jedel shara barysynda ózin «ortalyq qyzmetkerimin» dep tanystyryp, júrgizýshi kýáligin alýdy jedeldetý úshin 60 myń teńge alǵan azamat qolǵa tústi. Dál osyndaı shara Túrkistan oblysynda da júrgizildi. 22 aqpanda Saıram aýdanyndaǵy Mamandandyrylǵan HQKO-da «kóliktiń memlekettik tirkeý nómirin alýǵa kómek kórsetemin» degen jeleýmen 50 myń teńge talap etken azamat ustaldy. Qazirgi ýaqytta anyqtalǵan barlyq fakti boıynsha sotqa deıingi tergeý amaldary júrgizilip jatyr jáne kináli tulǵalar jaýapkershilikke tartylady», - dedi Nurdildá Oraz.
