Maman: Vaktsınalaýdaǵy basty qorqynysh – adamdardyń ekpege qatysty medıtsınalyq taqyrypty jete túsinbeýi
Almaty Psıhıkalyq densaýlyq ortalyǵynyń dırektory Sapar Rahmensheev megapolıs turǵyndaryna koronavırýsqa qarsy ekpe jasaý kerektigin aıtty.
Onyń pikirinshe, vaktsınatsııa qazirgi epıdemıologııalyq ahýalmen kúresýdiń eń tıimdi ádisi. Vaktsınalaýdaǵy basty qorqynysh – adamdardyń ekpege qatysty medıtsınalyq taqyrypty jete túsinbeýi.
«Vaktsınalaý – bul juqpaly aýrýlarǵa spetsıfıkalyq ımmýnıtet qurý úshin adam aǵzasyna medıtsınalyq ımmýnobıologııalyq preparattardy engizý», - dep túsindirdi ol.
Spıker vaktsınatsııadan bas tartý boıynsha kóptegen zertteýler júrgizilgenin málim etti.
Onyń aıtýynsha, zertteýlerde respondentterdiń kópshiliginiń osy salada tıisti bilimi joq ekendigi anyqtalǵan, sondaı-aq olar dálel retinde rastalmaǵan aqparat kózderinen alynǵan naqty emes dostarynan, tanystarynan, týystarynan, ınternettegi maqalalardan, áleýmettik platformalardan jáne basqalardan alynǵan jalǵan aqparatqa senedi.
«Vaktsınalanýdan bas tartýdyń sebebi – bul qysqa merzimde jasalǵan koronavırýs ınfektsııasyna qarsy qoldanystaǵy vaktsınalarǵa senbeý, az ýaqytta jasalsa, nátıje sapasyz ónim paıda bolady degen pikir keń taralǵan. Bul málimdeme buqaralyq aqparat quraldarynan vaktsınatsııadan keıin ólim týraly alynǵan aqparatpen baılanysty, sodan keıin ólim qorqynyshy paıda bolady. Árıne, eger adam vaktsınany onyń ómirine qaýip tóndirý nemese teris saldarmen baılanystyrsa, ol bas tartady. Bul qorqynyshtar jappaı psıhozdy týdyrýy múmkin, ol qazirgi psıhologııa turǵysynan epıdemııa men pandemııadan kem emes», - deıdi Sapar Rahmensheev.
Ol mundaı jaǵdaılarda dáleldi ádisti qoldanýdy jáne barlyǵyna qoljetimdi tilde baıandaıtyn bedeldi jáne ǵylymı aqparat kózderin zertteýdi usynady.
Sonymen qatar, ol psıhıkalyq densaýlyq ortalyǵynyń mamandary senim telefony arqyly kúmándanýshylarǵa keńes bere alatynyn atap ótti.
«Eger adam qatty alańdaýshylyq, mazasyzdyq pen abyrjýshylyqty sezinse, bul onyń denesiniń jaı-kúıine tikeleı áser etip, dert týdyrady. Quzyrly mamandardan vaktsınanyń oń áseri týraly naqty, tekserilgen, ǵylymı negizdelgen aqparat alǵannan keıin ǵana ol tynyshtalady», - deıdi Ortalyq dırektory.
Sóz sońynda Sapar Rahmensheev salaýatty ómir saltyn ustanýǵa, psıhıkalyq jáne fızıkalyq belsendilikti qalypqa keltirýge, uıqynyń ońtaıly kestesin qurýǵa jáne sergek júrýge, taza aýada serýendeýge, pozıtıvti oılaýǵa jáne jalǵan aqparatqa senbeýge, qaýipsizdik sharalaryn ustanýǵa keńes berdi.
«Eger densaýlyq nasharlasa, onda tez arada dárigerdiń kómegine júgingen jón»,- deıdi ol.
