Maman lıftilerdi paıdalanýdyń talabyna qatysty keńes berdi

NUR-SULTAN. QazAqparat – QR Indýstrııa jáne ınfraqurylymdyq damý mınıstrligi lıftilerdiń otandyq óndirisin damytýǵa qoldaý jasap otyr.

Sala sarapshylary Qazaqstannyń 3,2 myńǵa deıin lıft shyǵara alatynyna jáne lıft jabdyǵyndaǵy negizgi qajettilikterdi óz betinshe jaba alatynyna senimdi, dep habarlaıdy QazAqparat.

«Jyl saıyn Qazaqstan 5 myńnan astam lıft ımporttaıdy, al qoldanystaǵy otandyq óndiris tutynýshylyq suranystyń 21,4 paıyzyn ǵana jabady», - delingen mınıstrlik málimetinde.

Sarapshylardyń pikirinshe, naryqtyń jyldyq aýqymy 6920 lıft. Bul-paıdalaný merziminiń aıaqtalýyna baılanysty aýystyrýdy talap etetin jabdyqty esepke almaǵandaǵy kórsetkish. 2020 jyldyń sońyndaǵy aqparat boıynsha, elimizde osyndaı lıftilerdiń 5,7 myńy bar.

«Lıftilerdi paıdalanýdyń normatıvtik merzimi - 25 jyl. Minsiz jumys isteý úshin lıftter aı saıyn qyzmet kórsetetin kompanııa mamandary tarapynan josparly tekserýden ótýi kerek. Jylyna bir ret tehnıkalyq kýálandyrý júrgiziledi. Lıft resýrsyn eń kóbi 2 jylǵa uzartýǵa bolady. Osydan keıin lıftilerdi qaýipti tehnıkalyq qurylǵy retinde jańa jabdyqqa aýystyrý nemese jańǵyrtý júrgizý qajet. Reglamenttiń saqtalýyn turǵyn úı ıeleriniń birlestigi jáne turǵyndardyń ózderi qadaǵalap otyrýy kerek», - dedi Qazaqstan lıftshileri ulttyq qaýymdastyǵynyń prezıdenti Erjan Igibaev.

1 lıfttiń ortasha quny 10 mln teńge bolsa, jańa turǵyn úı qurylysy boıynsha ǵana naryq aýqymy 70 mlrd teńgeni quraıdy. Sonymen qatar, sarapshylardyń pikirinshe, lıft jabdyqtaryna suranys jyl saıyn 10 paıyzǵa artyp keledi.

Bul qarajat elimizdiń ekonomıkasynda qalýy úshin, jańa jumys oryndaryn qurýy jáne memlekettik qazynany tolyqtyrý baǵytynda Úkimet QR IIDM bastamasy boıynsha lıft jabdyǵy óndirisin «Qarapaıym zattar ekonomıkasy» baǵdarlamasyna engizdi. Osy oraıda óndirýshilerge eleýli preferentsııalar alýǵa múmkindik beredi.

Elimizde lıft jabdyqtaryn shyǵaratyn 3 iri kásiporyn jumys isteıdi: «AUXE» Aqmola lıft qurylysy zaýyty, «LGS KAZAKHSTAN ELEVATOR CROUP» JShS jáne «Almatylıft» JShS. Alaıda, sheteldik óndirýshilerdiń transferttik tehnologııalarymen kepildendirilgen jabdyqtyń básekelestik baǵasy men sapasyna qaramastan, zaýyttardyń óndiristik qýaty tolyq júktelmegen.

Mamandardyń pikirinshe, salany memlekettik qoldaý otandyq óndiristi jylyna 3200 lıftige deıin arttyrýǵa múmkindik beredi.