Maman: «QazTAG» HAA-men sharttar zańsyz jasalǵan
ASTANA. QazAqparat - Astanada Aqparat komıtetinen 169 mln. teńge jymqyrdy dep aıyptalǵan Seıitqazy jáne Áset Mataevtardyń isi boıynsha sot otyrystary jalǵasyp jatyr.
Sot otyrysynda QR Qarjy mınıstrligi qarjy baqylaý komıtetiniń mamany Shyńǵys Esjanov «QazTAG» HAA alty jyl qatarynan memlekettik aqparattyq saıasatty júzege asyrýda lottardy zańsyz alǵany týraly habarlady.
«2010 jyly BAQ arqyly aqparattyq saıasatty júzege asyrý boıynsha memlekettik satyp alýlardy ótkizýge konkýrs jarııalandy. Konkýrs qorytyndysy boıynsha keı lottar ótkizilgen joq dep tanyldy, óıtkeni lotqa eshkim qatystyrylǵan joq. Keıin uıymdastyrýshylar konkýrsqa qatyspaǵan «QazTAG» HAA» JShS-men bir kózden satyp alý tásili arqyly konkýrs ótkizý týraly zańsyz sheshim qabyldady. Osy jabdyqtaýshymen shart jasasty», - dep qosty ol.
Sarapshy mundaı jaǵdaı 2011 jyly oryn alǵany týraly aıtty.
«2011 jyly osyndaı qyzmetke konkýrs jarııalandy. Konkýrs ótkizilgen joq dep tanyldy. Odan keıin bir kózden satyp alýlar ótkizý sheshimi qabyldandy. Shaqyrý «QazTAG» HAA-ǵa jóneltildi, - dedi kýáger.
Shyńǵys Esjanovtyń sózine qaraǵanda, tenderdi zańsyz úılestirý jaǵdaıy 2015 jylǵa deıin jalǵasqan. Osylaısha, basymdyq «QazTAG» HAA ǵana berilgen.
Sonymen qatar, Mataev basqarǵan «QazTAG» HAA komıtetpen jasalǵan sharttar boıynsha kún saıyn memleket qyzmeti men elde júzege asyp jatqan memlekettik baǵdarlamalar týraly aqparattardy qoljetimdi etip jarııalaýy tıis edi.
«Esepter men oryndalǵan jumys aktilerine sáıkes 199 materıal ǵana jarııalandy. Saraptamalyq materıaldar múlde jarııalanbaǵan. Olardyń sany kúnine 5-7 bolýy tıis edi. Aıyna eń kemi 12 suhbat jarııalanýy kerek bolatyn. (...) Materıaldar memlekettik jáne orys tilderinde jarııalanýy tıis edi, bul da oryndalmady», - degen osyǵan deıin QBK mamany Darıǵa Apeıisova.
Aýdıt barysynda 2011 jyly sáýirde shart boıynsha aıyna 300-450 jańalyq bolýy tıis ekeni anyqtaldy. Al fakti boıynsha barlyǵy 150 boldy. Mamyr aıynda - bar-joǵy 127 jańalyq.
