Maman: «QazTAG» agenttiginiń qyzmeti memlekettik aqparat saıasatyn jyljytý talaptaryna jaýap bermedi
ASTANA. QazAqparat - Astanada Baılanys, aqparattandyrý jáne aqparat komıtetiniń shart talaptaryn oryndamaǵany úshin aıyptalǵan Seıitqazy jáne Áset Mataevtardyń isi boıynsha sot talqylaýy jalǵasýda.
Eske salsaq, Mataevtyń baqylaýyndaǵy «QazTAG» agenttigi BAAK-pen jasasqan sharttar boıynsha kún saıynǵy negizde ashyq túrde memlekettik qyzmet jáne eldegi iske asyrylyp jatqan memlekettik baǵdarlamalar týraly aqparatty ornalastyrýy tıis bolatyn.
Sot otyrysy barysynda QR Qarjy mınıstrligi Qarjylyq baqylaý komıtetiniń mamany Darıǵa Apeıisova «QazTAG» materıaldary azamattarǵa jabyq túrde jarııalanǵanyn habarlady. Bul shartty buzý bolyp tabylady. Saldarynan, tergeý nusqasy boıynsha, 2010-2015 jyldardaǵy negizsiz jumsalǵan qarajat 169 mıllıon teńgeni quraǵan.
«Barlyq aqparattyq habarlamalar shekteýli. Biletinim, bul úshin jeke tólem bar, al zańǵa sáıkes ol ashyq túrde ornalastyrýy tıis bolatyn», - dep atap ótti ol.
Mamannyń sotta aıtqandary fılologııalyq saraptama nátıjelerimen rastalady.
Otyrys barysynda saraptamany júrgizýge qatysqan fılologııalyq ǵylymdar doktory, professor Evgenııa Jýravleva tıisti málimdememen shyqty.
Jabyq túrde jarııalanatyn jáne/nemese aqyly jazylýdy talap etetin materıaldar memlekettik aqparattyq saıasatty jyljytýǵa jata ma degen suraqqa jaýap bergen Jýravleva: «Buqaralyq aqparat quraldary týraly» QR Zańynyń «Sóz, aqparatty alý jáne taratý bostandyǵy» 2-babyna sáıkes memlekettik organdar, qoǵamdyq birlestikter, laýazymdy adamdar men buqaralyq aqparat quraldary árbir azamatty onyń quqyǵy men múddesine qatysty qujattarmen, sheshimdermen jáne aqparat kózderimen tanysý múmkindigin qamtamasyz etýge mindetti ekendigin» málim etti.
Mamannyń pikirinshe, jabyq túrde júzege asyrylatyn aqparat halyqqa qoljetimdi bolmaıdy. Bul «QazTAG» agenttigine memlekettik aqparattyq saıasatty jyljytýǵa múmkindik bermeıdi, basqasha aıtqanda, agenttik jasalǵan kelisimderdi buzdy.
