Maman qaı kezeńde aǵzada koronavırýsty anyqtaý qıyn bolatynyn aıtty
NUR-SULTAN. QazAqparat - Ósimdikter bıologııasy jáne bıotehnologııasy ınstıtýty Molekýlalyq bıologııa zerthanasynyń meńgerýshisi Dılıara Grıtsenko aǵzada vırýsty anyqtaýdyń mán-jaıy týraly aıtty, dep habarlaıdy QazAqparat tilshisi.
«Testileýdiń ınfektsııaǵa qatysty sezimtaldyǵy tómen ekendigi týraly kóp aıtyldy. PTR tásili koronavırýs ınfektsııasyn anyqtaýmen qatar, AITV men vırýsty gepatıtti anyqtaý úshin paıdalanylyp keledi. Osy testilerdiń kómegimen naýqastardy esepke qoıý iske asyrylyp, vırýstyq ahýal anyqtalady», - dedi ol koronavırýstyń ekinshi tolqynyń júrý múmkindigin talqylaýǵa arnalǵan onlaın jıynda.
Mamannyń aıtýynsha, koronavırýs ınfektsııasy kúdigimen adamdardyń qaı kezeńde keletindigi mańyzdy bolyp otyr.
«Inkýbatsııalyq kezeńde vırýsty anyqtaý aıtarlyqtaı qıyn. 5-ten 14 kúnge deıin sozylatyn ınkýbatsııalyq kezeńde sımptomdar paıda bolǵansha vırýstyń qarqyndy kóbeıýi bolady. Sımptomdardan keıin besinshi, altynshy kúnde vırýstyq júkteme tómendeı bastaıdy. Pnevmonııa ári vırýsty etıologııasy bar adamdardyń kóbisi ózderinde koronavırýs anyqtalmaǵanyn, alaıda barlyq sımptomdar koronavırýs ınfektsııasyna uqsas ekenin aıtty. Ókinishke qaraı, osy kezeńde vırýstyq júkteme tómendeıdi, sondaı-aq bakterıaldyq belgiler baıqalady. Osy jaǵdaıda anyqtaý qıynǵa túsedi» - dedi D. Grıtsenko.
Onyń sózineshe, vırýsty ınfektsııalarǵa qatysty tekserý kúrdelileý. Sonymen qatar dıgnostıkasy da qıyndaý, sebebi vırýstardyń mýtatsııasy óte jyldam júredi.
