Mamadı Dýmbýıa Gvıneıa prezıdenti retinde ant qabyldady
ASTANA. KAZINFORM — Mamadı Dýmbýıa eldiń jańa Konstıtýtsııasynyń erejelerine sáıkes jeti jyldyq merzimge Gvıneıa prezıdenti retinde resmı túrde ant qabyldady. Bul týraly Sınhýa agenttigi jazdy.
M.Dýmbýıany ulyqtaý rásimi onyń prezıdenttik qyzmetke saılanýynan keıin ótti. Saılaýda ol daýystardyń 86,72 paıyzyn jınady.
Ant qabyldaǵannan keıin M.Dýmbýıa Gvıneıa halqyna kórsetken senimi úshin alǵys bildirip, óziniń mandaty eń aldymen áıelder men jastardyń múddesine arnalatynyn atap ótti.
Sondaı-aq ol Gvıneıanyń Konstıtýtsııasyn, zańdary men erejelerin, sondaı-aq sot sheshimderin qurmetteýge berik ekenin rastady.
Aıta keteıik, buǵan deıin Gvıneıada prezıdent saılaýy ótetinin habarlaǵanbyz.
Saılaýǵa 9 kandıdat qatysty. Onyń ishinde basty úmitker – sol kezdegi ýaqytsha memleket basshysy Mamadı Dýmbýıa boldy. Ol saılaýǵa táýelsiz kandıdat retinde tústi.