«Mama, telefondy óshirmeńizshi» – Qaza tapqan feldsherdiń anasy qyzymen sońǵy áńgimesi týraly
ASTANA. KAZINFORM – Qyzmettik mindetin atqarý kezinde qaza tapqan feldsher Uldana Myrzýannyń anasy Sálıma Omarova sotta jaýap berýdi bastady. Ol 8 qarashada qyzymen sońǵy ret sóıleskenin jáne qaıǵyly jaǵdaı týraly qalaı bilgenin aıtyp berdi.
Sálıma Omarovanyń aıtýynsha, 8 qarasha kúni tańerteń Uldana oǵan beıneqońyraý arqyly habarlasqan. Bul shamamen tańǵy saǵat 9-da bolǵan.
– Sol kúni Shymkent qalasyna barýym kerek edi. Qyzyma vıdeony óshirip, ádettegi qońyraýmen sóıleseıik, úıdi jınap, jolǵa shyǵýym kerek dep aıttym. Sodan keıin vıdeony óshirip, ádettegi qońyraýmen sóılestik, – dedi ol.
Onyń aıtýynsha, Uldana ár shaqyrtýǵa barǵan saıyn anasyna habarlasyp otyrǵan.
– Ár shaqyrtýǵa barǵan saıyn maǵan habarlasyp otyratyn. Men de qyzyma «Adamdar kómek surap shaqyrady, qolyńnan kelse, barynsha kómektes» dep aıtatynmyn. Ol kezde qandaı shaqyrtýǵa bara jatqanyn aıtqan joq. Sebebi shyqqan soń aýyr bolǵanyn nemese jeńil bolǵanyn aıtyp otyratyn, – dedi Sálıma Omarova.
Sol kúni Uldana anasymen kóbirek sóılesýdi qalaǵan.
– «Qyzym, asyǵyp tur edim» dedim. Ol da «Mama, telefondy óshirmeńizshi, shaqyrtýǵa jetkenshe ýaqyt bar, taǵy biraz sóıleseıikshi» dedi. Sol kúni azyq-túlik alýym kerek edi. Aýylda úlken dúken joq, 20-30 mınýt jerdegi dúkenge barýym kerek boldy. Taksıge otyryp, telefonmen sóılesip otyrdym, – dedi ol.
Uldana da shaqyrtý ornyna jetkenin aıtyp, jumystan shyqqan soń qaıta habarlasatynyn jetkizgen.
– «Mama, shaqyrtýǵa keldim, shyqqan soń sizge habarlasamyn» dedi. Men de «Jaraıdy, shyqqan soń habarlasarsyń» dedim. Dúkenge barǵanym sol edi, zattarymdy kassaǵa aparǵanda Ádilettiń anasy, qudaǵıym habarlasty. Eki-úsh ret qońyraý shalǵasyn trýbkany kóterdim. Daýsynyń ózgerip ketkenin estip, qorqyp kettim, – dedi Uldananyń anasy.
Onyń aıtýynsha, qudaǵıy Uldananyń ústine dúkenniń qabyrǵasy qulaǵanyn aıtqan.
– Men «shaqyrtýdan shyǵyp, dúkenge kirgen bolar, jaı ǵana dúkenniń bir sóresi qulaǵan shyǵar» dep oıladym. Sebebi jańa ǵana qyzymnyń daýsyn estigen edim, – dedi Sálıma Omarova.
Kóp uzamaı oǵan úlken qyzy da habarlasyp, Uldananyń aýrýhanaǵa túskenin aıtqan.
– Úlken qyzym qońyraý shalyp, «Tez jetińiz, bılet alamyn, Uldana aýrýhanaǵa tústi» dedi. Dúkende eseńgirep otyryp qaldym. Esimdi jıǵan soń birden taksıge júgirdim. Ol kezde túske jaqyndap qalǵan edi. Aýyldan Shymkentke jetkenshe saǵat 16:00-17:00 boldy. Ushaqtan túse sala qyzyma keldim, – dedi ol.
Aýrýhanaǵa kelgende Sálıma Omarovany balalarymen birge Ádilet pen qudaǵıy kútip alǵan.
– Aýrýhanaǵa keldim. Mundaı jaǵdaı bolady dep kútpedim. Aldymnan balalarym, Ádilet pen qudaǵıym kútip aldy. Qyzymdy otadan keıin jansaqtaý bólimine alyp kelgen eken. Bizdi kirgizbeı, reanımatsııanyń aldynda kúzetip otyrdyq. Tań atqansha uıyqtaı almadym, – dedi ol.
Keıin dárigerler aýysqan soń, Uldananyń anasyn ǵana reanımatsııaǵa kirgizgen.
– Jansaqtaýda birneshe adam jatyr. Qyzymnyń qaıda jatqanyn birden tappadym, tipti óz qyzymdy tanı almadym. Ony mundaı aýyr jaǵdaıda bolady dep oılamappyn. Qyzymnyń betinen súıip, ıiskep, aıtqym kelgen barlyq sózimdi aıtqym keldi. Biraq qyzymnyń meni estimeıtinine kózim jetti. Dárigerler kóp turýǵa bolmaıtynyn aıtyp, meni syrtqa alyp shyqty, – dedi Sálıma Omarova.
Sot otyrysynda saǵat 15.00-ge deıin úzilis jarııalandy.
Buǵan deıin marqum feldsherdiń jubaıy Ádilet Zeınel áıelimen ótken sońǵy saǵattar týraly aıtyp bergen edi.
Sondaı-aq Á. Zeınel Astana ákimdiginen alǵan 20 mln teńgeni qaıda jumsaǵanyn túsindirdi.
