Malynan aıyrylǵan sharýa ıesi veterınarlardy sotqa bermek
Aqsý aýdanynyń turǵyny 11 bas malynyń brýtsellez aýrýyna shaldyqqanyna kúmándanýda, dep habarlaıdy QazAqparat tilshisi.
Murat Ormanovtyń sózinshe, mamandar alǵashqyda aýrýǵa shaldyqty degen maldardan ekinshi márte synama alýǵa kelisimin berip, artynsha onyń jasalýyna jol bermeı qoıǵan. Sebebi, ekinshi márte qan alýǵa bolmaıtynyn alǵa tartqan. Bul jaıt Murattyń kúmánin tipten údete túsken. Onyń aıtýynsha, 11 bas maldy qojalyqtan ol joq kezde kólikke tıep, Taldyqorǵanǵa alyp ketken.
Al Aqsý aýdandyq veterınarııa stansasynyń dırektory Gúlzııa Bolathanqyzy aýrý maldardyń anyqtalǵany jóninde ıesine eskertilgenin aıtýda. Ol brýtsellezge shaldyqqan 11 bas mal sanıtarlyq soıys retinde óńdelý úshin jeke kásipkerge ótkizilgenin jetkizdi. Al memleketten arnaıy baǵdarlama boıynsha 10 mln teńge nesıe alyp, malmen jan baqqan azamat zeńgi baba tólin qanshaǵa baǵalaǵanynan da habarsyzbyn dep otyr.
«Maldy mensiz alyp ketti. Myna maldar aýrý degen bir túıir qaǵaz da tastamaǵan. Olardyń malǵa qansha beretini belgisiz. Erteń 2 myń teńge berip tursa, men ne isteıtinimdi bilmeımin. Bala-shaǵamdy qalaı asyraımyn. Erteń alǵan 10 mıllıon teńge nesıemdi qalaı tóleımin?», - deıdi «Nur Meken» sharýa qojalyǵynyń ıesi.
Murat Ormanovtyń sózinshe, aıdyń basynda sharýashylyqtaǵy 90 bas malǵa aýsylǵa qarsy ekpe salynǵan. Bir táýlikten soń maldardyń basym bóligi aqsap, júre almaı qalypty. Tipti, eki sıyry ólip te qalǵan. «Mamandarǵa der kezinde aıtyp, eskertkenimmen, eshbir jandy qojalyqqa keltire almadym», dep otyr. Ol salynǵan vaktsınalardyń sapasyna kúmán keltirýde. Soraqysy sol, endi maldardyń neden ólgenin mamandar da anyqtaı almaıdy. Sebebi, olar der kezinde eskertpegenin aıtady. Al sharýa ıesi ýaqytynda habar bergenin aıǵaqtaıtyn dálelim bar dep otyr. Endi osy jaıttar boıynsha qojalyq ıesi quzyrly organǵa shaǵymdanbaq.
