Malyn qaraýsyz jibergen turǵyndarǵa qatań sharalar qoldanylady -Almaty oblysy
Almaty oblystyq Polıtsııa departamenti baspasóz qyzmetiniń málimetinshe, 14 qarasha kúni Kóksý aýdanyna qarasty Musabek aýyldyq okrýginiń turǵyndaryna aýdandyq polıtsııa, prokýratýra organdarynyń basshylyǵy kelip, mal urlyǵynyń aldyn alý boıynsha túsindirý jumystaryn júrgizdi.
Aýdan ákiminiń qoldaýymen ár aýyldyq okrýgte qaraýsyz júrgen maldar arnaıy daıyndalǵan qoralarǵa qamalatyn bolady.
«Mal urlyǵynyń aldyn alý úshin ıesiz maldy qamaýǵa májbúrmiz. Óıtkeni, qańǵyryp júrgen mal kez kelgen urynyń ońaı oljasy ekeni belgili. Qamalǵan mal úshin akt jasalyp, ıesi anyqtalady. Mal ıesine 2 aılyq eseptik kórsetkish mólsherinde aıyppul salynady. «Mal urlyǵy» jedel aldyn alý is-sharasy barysynda 15 astam turǵyn ákimshilik jaýapkershilikke tartylsa, keıbir turǵynǵa eskertý jasaldy»,- dedi Kóksý aýdany polıtsııa bólimi bastyǵynyń ýaqytsha mindetin atqarýshy polıtsııa maıory Nurbolat Tólebaev.
Polıtsııa ókilderi jaıylymda júrgen mal «kóldeneń kelgen kók attynyń» jeteginde ketýimen qatar, avtojolda kólik apatyna ákelýi múmkin ekenin aıtty.
«Qaraýsyz mal avtojoldarǵa shyǵyp, jol-kólik apatyna sebepker bolatyn jaıttar kezdesedi. Bıyl mal qaǵýdyń 10 deregi tirkeldi. Sonyń saldarynan jolaýshylar ártúrli dene jaraqattaryn aldy. Turǵyndardyń maly aman bolyp, qylmystardy boldyrmaý úshin jáne túngi mezgilde jolǵa shyǵyp ketpes úshin maldaryn qaraýsyz jibermeýdi suraımyz»,- dep tolyqtyrdy Nurbolat Tólebaev.
Esterińizge sala keteıik, Almaty oblysy aýmaǵynda mal urlyǵynyń aldyn alýǵa jáne zańsyz mal jáne et ónimderin tasymaldaýdy boldyrmaýǵa baǵyttalǵan «Mal urlyǵy» jedel aldyn alý is-sharasy ótip jatyr.
