Maly urlanyp ashynǵandar kinálilerdi ózderi jazalap jatyr - Bektas Beknazarov
ASTANA. QazAqparat - Aýyl turǵyndary mal urlyǵy boıynsha memlekettik organdardyń qyzmetkerleri qaýqarsyz ekenin, al mal urlaýshylar erkindikte taırańdap júrgenin aıtyp shaǵymdanady. Parlament Senatynda ótken dóńgelek ústel barysynda Parlament Senaty Tóraǵasynyń orynbasary Bektas Beknazarov osyndaı másele kóterdi, dep habarlaıdy QazAqparat tilshisi.
«Mal urlyǵy boıynsha qylmystyq isterdiń 90 paıyzy zańnamalyq turǵyda aýyrlyǵy ortasha qylmystardyń sanatyna jatady. Aqyry, taraptar tatýlasady da, aıypker jazadan qutylyp ketedi. Statıstıka boıynsha, qylmystyq isterdiń 25 paıyzy taraptardyń tatýlasýymen aıaqtalyp, tek 14 paıyzy ǵana sotta qaralady. Ózimiz biletindeı, eger adam qylmysyna qaraı laıyqty jazasyn almasa, álbette, jazalanbaıtynyn bilip, odan da aýyr qylmysqa barýy múmkin», - deıdi Bektas Beknazarov.
Senat Tóraǵasy orynbasarynyń aıtýyna qaraǵanda, mal urlyǵyna aıyptylar tatýlasý arqyly jazadan qutylyp ketedi.
«Ásirese, shekaralas aýdandardaǵy jaǵdaı ýshyǵyp tur. Ol jerlerde mal tabynymen kórshi elderge aıdalyp ketýi múmkin. Mal ıeleri men sharýashylyq ıeleriniń, jergilikti ózin-ózi basqarý organdary men aýdan ákimdikteriniń esepke tirkeý, tabyn shyǵarmaý, qujatqa tirkemeý sekildi quqyqtyq bazamen sanaspaýynyń aqyry amalsyz mal urlyǵynyń kóbeıýine ákeledi», - deıdi ol.
Bektas Beknazarov óz sózinde aýyl turǵyndarymen jıi kezdesetinin, olar kóp jaǵdaıda mal urlyǵyna kóp shaǵym aıtatynyn tilge tıek etti.
«Aýyl turǵyndary atalmysh máselede memlekettik organdardyń qyzmetkerleri qaýqarsyz ekenin, al mal urlaýshylar erkindikte taırańdap júrgenin aıtyp shaǵymdanady. Tipti zańnan kúder úzgen keıbiri kinálilerdi ustap alyp, ózderi jazalap jatyr. Bul zańnyń álsizdigin kórsetedi. Men qazirgi tańda májilismenderdiń bir toby qylmystyq kodekstiń zańnamalyq sharalary boıynsha jumys júrgizip jatqanyn bilemin. Bul máselege biz de aralasyp, ony tereń taldaýymyz kerek», - dedi Bektas Beknazarov.
Eske sala ketsek, atalmysh dóńgelek ústelde QR Іshki ister mınıstriniń birinshi orynbasary Janat Súleımenov elimizde jalpy urlyq jaǵdaılary jáne mal urlaýshylarmen kúres qalaı júrgizilip jatqanyn aıtyp bergen bolatyn.
