Malta maýsym aıynda Palestınanyń táýelsizdigin moıyndaıdy
ASTANA. KAZINFORM — Malta premer-mınıstri Robert Abela óz eli jaqyn arada Palestınanyń táýelsizdigin moıyndaıtynyn málimdedi, dep habarlaıdy Times of Malta.
Maltada Palestına elshisi bar jáne bul el 2024 jylǵy BUU Bas Assambleıasynyń Palestına memleketiniń uıymǵa tolyqqandy múshe bolý quqyǵyn moıyndaıtyn qararyn qoldady, biraq Palestına memleketin resmı túrde taný týraly áli jarııalaǵan joq.
Abelanyń aıtýynsha, tıisti málimdeme 20 maýsymda BUU-nyń qoldaýymen Saýd Arabııasy men Frantsııa uıymdastyratyn halyqaralyq konferentsııada jarııalanady. Malta ókilderi konferentsııada óz elderiniń Palestınany moıyndaıtyn jalǵyz el bolmaıtynyn aıtty.
Axiostyń jazýynsha, Frantsııa da maýsym aıynda Palestınanyń táýelsizdigin moıyndaýdy josparlap otyr. Frantsııa prezıdenti Emmanýel Makron 2025 jyldyń sáýirinde France 5 arnasyna bergen suhbatynda mundaı málimdemeni «taıaý aılarda» jasaýdy josparlap otyrǵanyn aıtty. HAMAS toby sol kezde Frantsııanyń Palestınany taný sheshimin «mańyzdy qadam» dep atasa, Izraıl Syrtqy ister mınıstri Gıdeon Saar «jalǵan memleketti» moıyndaýdy aıyptap, ony «terrorızm úshin syılyq» dep atady.
2024 jyly Norvegııa, Irlandııa, Ispanııa, Slovenııa jáne Armenııa Palestınanyń táýelsizdigin moıyndaǵanyn jarııalaǵan bolatyn.
Eske sala keteıik, Izraıl Gaza sektoryna barlyq turaqty áskerı brıgadalaryn kirgizdi.