Malshy, mehanızatorlarǵa memleket tarapynan qoldaý kerek - BQO
BQO-ǵa jumys saparymen kelgen QR Parlamenti Májilisiniń depýtaty Jeksenbaı Dúısebaevtyń Syrym aýdanynda aýyl sharýashylyǵy máseleleri boıynsha ótken sala mamandarymen jáne turǵyndarmen jınalysynda aýyldyq jerde osyndaı kadrlardyń asa qat ekendigi sóz boldy. Syrymdyq sharýa Islambek Ózbekovtiń aıtýynsha, jyl sanap mal baǵatyn adamdar azaıyp barady. Sol sekildi mehanızatorlar da sıreksip ketti. Sondyqtan mundaı mamandyq ıelerine «Dıplommen - aýylǵa» baǵdarlamasy boıynsha jeńildikter qarastyrylǵany jón. Depýtat bul máseleni qoldady.
Sonymen qatar «Shiderti» sharýa qojalyǵynyń jetekshisi Baqytjan Hamıdýllın aýyl sharýashylyǵy tehnıkalarynyń quny qymbattap ketkenin jetkizse, «Toqmyrza» sharýa qojalyǵynyń basshysy Serik Jonysov veterınarlyq sharalardyń oıdaǵydaı atqarylmaıtynyn qaperge berdi.
Májilis depýtaty sondaı-aq Aqjaıyq, Jańaqala aýdanynda bolyp, aýyl sharýashylyǵy óndirisi oryndarynyń, sharýa qojalyqtarynyń jumystarymen tanysty.
Jeksenbaı Qartabaıuly júzdesýlerde Elbasy N.Nazarbaevtyń «Qazaqstannyń úshinshi jańǵyrýy: jahandyq básekege qabilettilik» atty Joldaýyna jáne «Bolashaqqa baǵdar: rýhanı jańǵyrý» atty baǵdarlamalyq maqalasyna baılanysty alda turǵan maqsat-mindetterge, elde atqarylyp jatqan jumystarǵa toqtaldy. Aýyl sharýashylyǵyn damytý baǵytynda qolǵa alynǵan memlekettik baǵdarlamalardyń júzege asyrylý barysy sóz boldy. Bul oraıda shaǵyn qojalyqtar iri kooperatıvterge birikse, olarǵa memleket tarapynan qoldaý kórsetile beretini aıtyldy.
Aıta keteıik, J.Dúısebaevtan basqa Májilis depýtattary Záýresh Amanjolova, Baqtııar Máken de óńir turǵyndarymen kezdesýler ótkizip, olardyń kókeıindegi saýaldaryn tyńdap, jaýap berýde.
