Málik Hasenov Djeı Lo kontserti jaıynda: Qaırat Nurtasqa qaraǵanda arzanǵa túsedi

ASTANA. KAZINFORM — «Astana Kontsert» kompanııasynyń prodıýseri Málik Hasenov sheteldik juldyzdardyń ishinen nelikten tańdaý Djennıfer Lopeske túskenin aıtty.

— Qıyn tańdaý boldy. Biz Djennıfer Lopes pen Qaırat Nurtas ekeýiniń birine tańdaý jasadyq. Sodan keıin biz baǵalaryn zerdelep, qaısysynyń baǵasy tómen ekenin qaradyq. Sondyqtan tańdaý Djennıfer Lopeske tústi. Eger ázilsiz jaýap bersem, jarty jyl kelissóz júrgizip, juldyzdyń gastrol jolyn zerdeledik. Jalpy, 13 juldyzdyń gastrol jolyn qarastyrdyq, — dep qaljyńmen bastady jaýabyn Málik Hasenov Ortalyq kommýnıkatsııalar qyzmetindegi brıfıngte.

Onyń atap ótýinshe, tańdaý jasaǵan kezde eń aldymen ártistiń gonoraryna mán beriledi. Odan keıin logıstıkaǵa nazar aýdarylady.

— Menińshe, Instagram-da 258 mln jazylýshysy, bizden on ese kóp tyńdarmany bar ártistiń bizge kelýi óte keremet, — dedi ol.

Buǵan deıin 1 tamyzda «Astana Arena» stadıonynda álemge áıgili ánshi Djennıfer Lopestiń kontserti ótetindigin jazǵan edik.  Bıletter erteń satylymǵa shyǵady. 

Elordadaǵy kontsert álemdik juldyzdyń Up All Night týrnesi aıasynda ótpek. Álemdik týr 1 shildede bastalyp, 3 tamyzǵa deıin jalǵasady. Ol álemniń 17 qalasyn qamtıdy, sonyń ishinde: Antalıa men Ystanbul, Madrıd pen Barselona, Býdapesht, Varshava, Býharest, Ábý-Dabı qalalary bar.