Malıka Ermek: bapkerler men komandaǵa alǵys aıtamyn
HARBIN.KAZINFORM – Short-trekten Qazaqstan quramasynyń sportshysy Malıka Ermek Kazinform tilshisine suhbat berip, qysqy Azıada júldegeri atanǵannan keıingi áserimen bólisti.
Qazaqstandyq sportshy altyn medalǵa bir taban jetpeı qalǵanyn jasyrmady.
– Negizgi maqsat altyn medal bolǵan. Alaıda jarys kezinde azdaǵan kedergiler bolyp, márege ekinshi bolyp keldik. Azııa oıyndaryna kóp nazar aýdardyq, daıyndyq jáne kóńil kúı, bári tamasha boldy. Estafetadan keıin, 500 metr jekeleı synda jarys jolyna shyqtym. Ókinishke qaraı jolym bolmady. Biraq, alǵa qoıǵan maqsattarymdy tolyq oryndadym, - dedi Malıka.
Otandasymyz qysqy Azııa oıyndarynyń uıymdastyrylý deńgeıin joǵary baǵalady.
– Bul meniń Harbın qalasyna birinshi ret kelýim. Osyǵan deıin, Beıjiń qalasynda Álem kýbogyna qatysyp, Hýlýnbýır qalasynda qysqy Azıadaǵa daıyndyq ótkizdik. Jalpy, Qytaı sporttyq jarysty árdaıym joǵary deńgeıde ótkizedi. Sonymen qatar, munda muzdyń sapasy óte jaqsy, jaqsy kórsetkishter jaratýǵa múmkindik kóp, - deıdi Malıka.
Malıka Ermek búgingi kúmis medal Qazaqstan quramasynyń Azıadada aralas estafetadan jeńip alǵan alǵashqy kúmis júldesi ekenin aıtty. Osyǵan deıin, otandyq short-trekshiler qola medal enshilegen. Sondaı-aq, ol Qazaqstandyq jankúıerlerdi ózderin qoldaýǵa shaqyrdy.
– Erteń biz 1000 metrden shırek fınalda jekeleı synda jarys jolyna shyǵamyz. Komandalyq synda, qyzdar 3000 metrden estafetada, al uldar 5000 metrden estafetada baq synaıdy. Qoldaý bildirip jatqandarǵa kóp raqmet! Biz árdaıym daıynbyz, jalǵasty qoldaýlaryńyzdy kútemiz. Sizderdiń qoldaýlaryńyz biz úshin erekshe mańyzdy, - dedi ol.
Sońynda, sportshy barlyq bapkerler men komandaǵa óz alǵysyn bildirdi.
– Barlyq bapkerlerge jáne bizdiń komandaǵa ulken alǵysymdy bildiremin. Olardyń qoldaýlary jáne jan-jaqty kómekteri bizdiń jaqsy nátıjege qol jetkizýimizde mańyzdy ról atqarady,- deıdi Malıka Ermek.
Aıta keteıik, Qazaqstandyq short-trekshiler búgin Qytaıdyń Harbın qalasynda ótip jatqan qysqy Azııa oıyndarynnyń short-trekten 2000 metrge syrǵanaýdan aralas komandalyq estafetada óner kórsetti. Qazaqstandyq Denıs Nıkısha, Ádil Ǵalıahmetov, ıAna Han jáne Malıka Ermek márege ekinshi bolyp jetip, el qorjynyna alǵashqy medaldy saldy.