Málik Myrzalın sý tasqynyna qatysty: Atbasardaǵy ahýaldy baqylap otyrmyz
ASTANA. QazAqparat - Aqmola oblysynyń ákimi Málik Myrzalın Atbasardaǵy sý tasqynyna qarsy qandaı sharalar júrgizilip jatqanyn aıtyp berdi, dep habarlaıdy «QazAqparat» HAA tilshisi.
«Aldaǵy jyldyń sý tasqynyna daıyndyq týraly... Birinshiden, tasqyn qaýpin joıýǵa qatysty topyraq úıý jumystary atqarylýda. Bul jumys aýdannyń sharýashylyq sýbektileriniń esebinen júrgiziledi. Demek, bıýdjetten bir teńge de jumsaǵan joqpyz. Barlyǵy da demeýshilik esebinen jasalady. Atbasarda eki úlken jol jáne temirjol kópiri bar. Osy eki kópirdiń aýmaǵynda arnalar tazartylyp, butalar, túbirler men qoqystar joıyldy», - deıdi óńir ákimi.
Málik Myrzalınniń aıtýynsha, avtokólik kópirine syıymdylyǵy sekýndyna 40 tekshe metr bolatyn tıýnıngti qubyrlar ornatylǵan.
«Biz jumysty kóktemge deıin jalǵastyramyz. Sebebi qysta ózender qatyp, tehnıkalarmen jumys isteý jeńildeı túsedi. Adamdarǵa keletin bolsaq, biz aıyna 40 myń teńge mólsherinde páter jaldaý úshin qajetti somany bóldik. Atbasar úshin bul ótemaqy jetkilikti. Qazirgi ýaqytta 11 standartty 45 páterli turǵyn úılerdi salý boıynsha jumystar júrgizip jatyrmyz. Bıylǵy jyly 6 úıdi aıaqtaýdy josparda bar, kelesi jyly 5 úı beriledi», - deıdi ol.
Aımaq basshysynyń sózine sensek, Atbasarda Aýyl sharýashylyǵy mınıstrliginiń sý resýrstary komıtetiniń komıssııasy jumys júrgizgen. Olardyń sheshimi boıynsha Atbasardy sý tasqynynan qorǵaıtyn ónerkásiptik bógetti salý kerek eken.
«Biz bul máseleni zerttep jatyrmyz. Bir jaǵynan bógettiń qalaı bolatynyn jáne qanshalyqty qymbatqa túsetinin bilý úshin JSQ úshin aqsha bóldik. Tıimdi jáne arzan joldaryn da qarastyryp jatyrmyz. Bul másele boıynsha 11 úı tapsyrylǵan soń, báribir 300-ge jýyq adam sý tasqyny bolýy múmkin aýmaqta qalady. 12-13 eldi mekende taǵy 100 adam bar. Bul adamdar úshin sý tasqyny aımaǵynan tys turǵyn úı salý ońaıyraq bolýy múmkin. Eki kún buryn Atbasarda boldym. Orynbasarym aptasyna bir ret shyǵyp, tehnıkalyq máselelerdi qarastyryp, halyqpen kezdesedi. Tipti birinshi kezekte páterlerdi kimge bólý kerektigi jóninde komıssııa qurdyq. Bul komıssııaǵa sheneýnikter kirgen joq. Komıssııa páter alý boıynsha aldyńǵy kezektegi 270 otbasyn anyqtady. Bir qyzyqty jaǵdaıdy aıta keteıin, Atbasardaǵy bir áje maǵan: «Málik Keńesbaıuly, men jalǵyz turamyn, balalary, naýqastary bar otbasylarǵa qarasyńyzdar» dep qolqa saldy», - deıdi óńir basshysy.
