Málik Myrzalın ınvestorlarmen kezdesti
KÓKShETAÝ. QazAqparat - Aqmola oblysynyń ákimi Málik Myrzalın ınvestorlarmen birqatar kezdesýler ótkizdi, dep habarlaıdy «QazAqparat» HAA tilshisi ákimdiktiń ishki saıasat basqarmasyna silteme jasap.
Aımaq basshysy aldymen «BI Group» kompanııasy dırektorlar keńesiniń múshesi Baýyrjan Isabaevty qabyldady. Taraptar Aqmola oblysynyń qurylys salasyna qatysty yntymaqtastyq máselesin qozǵady. Atap aıtqanda, turǵyn úıler, Şýche-Býrabaı kýrortty aımaǵyn damytý jospary aıasynda salynatyn joldardyń qurylysy sóz boldy.
Budan soń Málik Myrzalın «VAKConsultingEngineers» amerıka-ońtústik koreıa-túrik konsortsıýmynyń ókili Fahım El-Horımen kezdesip, oblys ortalyǵynda JES qurylysyn salý máselesin talqylady.
«Búgingi kúni Aqmola oblysynyń ári qaraı áleýmettik-ekonomıkalyq damýy úshin Kókshetaý qalasynda JES salý máselesi óte ózekti. Bizde jobanyń bekitilgen tehnıkalyq-ekonomıkalyq negizi bar. Endi qarjylandyrý tetikterin naqtylap, energetıka salasynda osyǵan uqsas jobalardy júzege asyrýda tájirıbesi bar merdigerlerdi qarastyratyn bolamyz», - dedi Málik Keńesbaıuly.
Óz kezeginde «VAKConsultingEngineers» konsortsıýmynyń basshysy Fahım El-Horı oblys basshysyna jyly qabyldaýy úshin alǵys aıtyp, sońǵy 25 jylda energetıka salasynda osyǵan uqsas jobalardy salyp, mashyqtanǵandaryn aıtty.
Kezdesý sońynda M.Myrzalın ózara yntymaqtastyqqa nıet bildirgen ınvestorlar úshin, Aqmola óńiri qashanda ashyq ekendigin jetkizdi.
Eske sala keteıik, atalǵan jobany salýǵa búginde birqatar sheteldik kompanııalar qyzyǵýshylyq týdyrýda. Jalpy Kókshetaýda qýattylyǵy 180 MVt (elektrli), jáne 450 Gkal/ch (jylý) jylý elektr stantsııasyn salý eski jylý qazandyqtaryn aýystyrýǵa jáne turǵyndardy jyl boıy ystyq sýmen qamtamasyz etýge múmkindik beredi.
