Málik Myrzalın Atbasardyń sý tasqynyna daıyndyǵyn tekserdi
KÓKShETAÝ. QazAqparat - Aqmola oblysynyń ákimi Málik Myrzalın Atbasar aýdanynyń kóktemgi sý tasqynyna daıyndyǵyn tekserdi, dep habarlaıdy QazAqparat tilshisi ákimdiktiń baspasóz qyzmetine silteme jasap.
Vedomstvonyń málimeti boıynsha, aımaq basshysy sapar barysynda Atbasar aýdanynyń sý tasqynyna qaýipti aýmaqtaryn aralap kórdi.
«Jabaı, Esil, Jylandy jáne Shortanbaı ózenderinde sýdyń irkilissiz aǵýyn qamtamasyz etý baǵytynda muz jarý sharalary atqaryldy. Ótken jyly barlyǵy 8 myń sharshy metr aýmaqta muz jarylsa, bıyl bul kórsetkish 1,5 sharshy metrge artyp otyr.
Qaýipti aýmaqta ornalasqan Atbasardaǵy №1 orta mektepti 2014 jáne 2017 jyldary sý shaıyp ketti. Qazirgi kezde, bilim ordasyn aınala qorshaı bıiktigi 1 metrge jýyq, ınertti materıaldar salynǵan 4 myńnan astam qap tóseldi.
Al jańa shaǵynaýdanda kópqabatty 12 turǵyn úı salyndy. 45 páterli ár úıde bir bólmeli - 15 páter, eki bólmeli - 18 páter, úsh bólmeli - 12 páter bar», dep atap ótti Aqmola oblysy ákiminiń baspasóz qyzmetindegiler.
Aıta keteıik, 2017 jyly bolǵan sý tasqynynan Atbasar aýdanynda 544 turǵyn úı apatty dep tanyldy. Sol kezde, zardap shekken turǵyndar úshin tutas bir kvartal turǵyzý týraly sheshim shyǵaryldy. Onyń ishinde zardap shekken 90 otbasy baspanaly boldy. Bul úıler ótken jyldyń sońynda paıdalanýǵa berildi.
Sonymen qatar, temirjol kópiriniń mańynda sý jiberý kólemin arttyrý boıynsha jumystar júrgizilýde. Jaqyn kúnderi bul jerde sý aǵynyn táýlik boıy onlaın rejımde baqylap, monıtorıng júrgizip otyrý úshin beınebaqylaý kamerasy ornatylady.
Budan bólek, Atbasar aýdanynda Jabaı jáne Esil ózenderiniń jaǵasyn boılaı buzylyp jatqan úılerdiń irgesi nyǵaıtyldy. Ózenniń túbi qamys jáne shópterden tazartyldy. Sý basý qaýpi bar áleýmettik nysandar men kósheler, aryqtar men sý jiberý nysandary qardan tazartylýda.
«Atbasardan bólek, «qyzyl aýmaq» - qaýipti aýmaqqa Sandyqtaý, Astrahan, Qorǵaljyn jáne Tselınograd aýdandary kiredi. Bul aýdandarda da aldyn alý sharalary júzege asyrylýda.
Aımaq basshysynyń tapsyrmasymen oblystyq azamattyq qorǵanys júıesi naýryzdyń 18-nen bastap joǵary daıyndyq rejımine kóshiriletin bolady», dep tolyqtyrdy vedomstvodan.
