Málik Myrzalın Astana irgesindegi aýyldar týrasynda: másele shynymen ózekti
ASTANA. QazAqparat - Astana irgesinde ornalasqan Aqmola oblysyna qarasty aýyldarda 13 mektep pen 15 balabaqsha salynady. Bul týraly OKQ-daǵy baspasóz máslıhatynda óńir basshysy Málik Myrzalın aıtty, dep habarlaıdy «QazAqparat» HAA tilshisi.
«Máseleler týraly aıtsaq, birinshiden, bul tek qana oblysqa qatysty jumys emes. Úkimetpen birge keshendi baǵdarlama bekitilgen», - deıdi oblys ákimi.
Onyń aıtýynsha, baǵdarlamaǵa sáıkes 2014-2020 jyldarǵa respýblıkalyq jáne oblystyq bıýdjetten 105 mlrd teńge bólý qarastyrylǵan. «Qazir bálkim ár aýyl boıynsha naqty aıtý múmkin emes. Sebebi baǵdarlamanyń birinshi kezeńi 20 eldimekenge arnalsa, ekinshi kezeńi 34 eldimekendi qamtyp otyr», - dedi ol.
Óńir basshysy atap ótkendeı, Astana irgesinde turatyn halyqtan shaǵymdar jıi túsip turady.
«Ol eldimekenderde halyq sany joǵary qarqynda ósip keledi. Máselen, baǵdarlama alǵash bastalǵan 2011 jyldan beri keıbir eldimekende halyq sany úsh esege artyp ketti. Qosshydaǵy halyq odan beri - 35 myńǵa, Qoıandyda - 11 myńǵa, Talapkerde 13 myń adamǵa ósti. Barlyq aýyldardaǵy ósim osyǵan uqsas. Keıbir eldimekenderde halyq azaıdy. Sol sebepti baǵdarlamanyń keı tustaryna ózgeris engizip jatyrmyz. Birinshi kezeń ınjenerlik ınfraqurylymdy negizge alsa, ekinshi kezeńde biz mektepter men balabaqshalardy turǵyzý máselesin kóterip otyrmyz», - deıdi ol.
Málik Myrzalın bul másele oblys ákimdiginiń únemi nazarynda ekenin jetkizdi.
«Óte kóp máseleler sheshilip jatyr. Biraq, joǵaryda aıtqanymdaı, halyq tez ósip jatqandyqtan, keıbir jumystarǵa úlgere bermeımiz. Kelesi jyly Astana qalasynyń shetinde 13 mektep, 15 balabaqsha salynady. Jol máselesi de umyt qalmaıdy. Aımaqtyq OKQ-nyń bólimshesinde osy aýyldarda atqarylatyn jumystar týraly aqparatpen bólisip otyraıyq. Óıtkeni, shynynda da, másele óte mańyzdy», - dedi aımaq ákimi.
