Málik Myrzalın aqmolalyq ustazdardy marapattady
KÓKShETAÝ. QazAqparat - Aqmola oblysynyń əkimi Málik Myrzalın pedagogtardyń kásibı merekesi qarsańynda, óńirdegi bir top atalmysh sala mamandaryn marapattady, dep habarlaıdy QazAqparat tilshisi.
Salanatty sharaǵa qatysqan aımaq basshysy óńir pedagogtaryn kásibı merkelerimen quttyqtady. «Bizdiń oblysymyzda 22 myńnan astam pedagog eńbek etedi. Bul - Qazaqstannyń bolashaǵy úshin jaýapty, bilikti mamandar. Muǵalim - bul jaı ǵana mamandyq emes, muǵalim bul - júrektiń qalaýy», - dep atap ótti óńir basshysy.
Atap ótilgendeı, kadrlyq máselelerdi sheshý maqsatynda bıylǵy jyldan bastap oblystyq bıýdjetten pedagogıkalyq mamandyqtar boıynsha JOO-larǵa 100 bilim granty bólindi.
Mektepterde jańartylǵan bilim berý baǵdarlamalary engiziledi, oqýshylar jańa oqýlyqtar boıynsha oqytylady, baǵalaý ádisteri ózgeredi, kóptildilik damý sútinde. Mektepterdiń 88 paıyzy ınternetke qosylǵan, qazir bul kórsetkishti 100 paıyzǵa jetkizý maqsaty tur. Oqýshylar úsh tilde 40 myń sandyq sabaqtar men 1 mln mýltımedııalyq materıaldarǵa qol jetkize alady. Táýelsizdik jyldarynda Aqmola oblysynda 14 myń oryndyq 40 mektep salynǵanyn aıta ketken jón.
Saltanatty shara barysynda 36 pedagog «Ybyraı Altynsarın», «Qazaqstan Respýblıkasynyń bilim berý isiniń qurmetti qyzmetkeri» tósbelgilerimen, Aqmola oblysy ákiminiń alǵys hattarymen, aqshalaı sertıfıkattarmen jáne demalys oryndaryna joldamalarmen marapattaldy.
«Búgin sezimge toly tamasha kún. Barlyq pedagogtardy kəsibı merekelerimen quttyqtaımyn. Meni ustazdyq jolǵa jetelegen ómirime alǵysymdy bildiremin, men ózimdi basqa salada elestete de almaımyn. Bizge, ustazdar úshin ár oqýshy qymbat, adam tárbıeleý - basty paryzymyz ben tabysymyz» -dedi Şýchınsk qalasyndaǵy joǵary kolledjdiń oqytýshysy Anton Lazorskıı.
