Málik Ǵabdýllın muralarynyń óskeleń urpaqty tárbıeleýde mańyzy zor
Kúni keshe Memleket basshysy Nursultan Nazarbaevtyń «Uly dalanyń jeti qyry» atty maqalasy jarııalanǵan bolatyn. Onda Elbasy «Rýhy myqty halyq qana myqty memleket qura alady» dep atap ótken edi. Rasynda da ult tarıhy men órkenıetin sanaǵa sińirý patroıtızmdi, ultqa, memleketke degen qurmet pen maqtanyshty qalyptastyratyny sózsiz. Jýyrda Kókshetaýda jaryq kórgen Keńes odaǵynyń batyry, ǵalym Málik Ǵabdýllın shyǵarmalarynyń 11 tomdyq jınaǵy - sonyń bir aıǵaǵy ispettes.
«Bul jınaqty Málik Ǵabdýllın mýzeıi qyzmetkerleriniń kópjyldyq ǵylymı-zertteý jumystarynyń nátıjesi deýge bolady. 11 tomdyq jınaqty shyǵarmas buryn biz ortalyq memlekettik muraǵat, QR Ulttyq kitaphanasymen birlese jumys istep, M.Ǵabdýllıniń eńbekteri men shyǵarmashylyǵy týraly materıaldardy jınastyrdyq. Bul jınaqqa batyrdyń shyǵarmalary men ǵylymı-pedagogıkalyq eńbekteri ǵana emes, buryn jarııalanbaǵan belgisiz maqalalary da engizildi. Bizdiń qyzmetkerler bul maqalalardy jyldar boıy jınaqtap, júıelep, basyp shyǵardy», - deıdi M.Ǵabdýllın mýzeıiniń bas qor saqtaýshysy Serikjan Júzjanov.
Jınaqty ázirleýge QR eńbek sińirgen qaıratkeri, UǴA akademıgi Ýálıhan Qalıjanov, fılılogııa ǵylymdarynyń doktory, professor Serik Negımov qatysty. Al, jınaqty basyp shyǵarý ıdeıasyn M.Ǵabdýllın mýzeıiniń qyzmetkerleri 2012 jyly josparlap, kitapqa qajetti materıaldardy jınastyryp qoıǵan. Alaıda, jınaq tek 2018 jyly ǵana Aqmola oblysynyń ákimi Málik Myrzalınniń tikeleı qoldaýynyń arqasynda 1 000 taralymmen basylyp shyqty.
Jınaqtyń tusaýkeser sharasyna aımaq basshysy Málik Myrzalın, Almatydaǵy halyqaralyq Qazaq PEN-klýbynyń prezıdenti Bıgeldi Ǵabdýllın, qoǵam qaıratkeri, jazýshy Jabal Erǵalıev, Sh.Ýálıhanov atyndaǵy Kókshetaý memlekettik ýnıversıtetiniń profesory, pedagogıka ǵylymdarynyń kandıdaty Sábıt Jámbek, Kókshetaý qalasyndaǵy Málik Ǵabdýllın mýzeıiniń dırektory Qudaıberli Myrzabek jáne Málik Ǵabdýllınniń qyzy Maıdan Málikqyzy bastaǵan jazýshynyń týǵan-týystary, qoǵam qaıratkerleri, aqyn-jazýshylar, pedagogtyń shákirtteri men buqaralyq aqparat ókilderi qatysqan bolatyn.
Shara barysynda 11 tomdyq jınaq Aqmola oblysynyń eki qalasy men 17 aýdanynan jáne Aqtóbe, Ońtústik Qazaqstan, Soltústik Qazaqstan, Pavlodar oblystary men Astanadan kelgen kitaphana ókilderine úlestirilgen edi.
«Rýhanı jańǵyrý» baǵdarlamasy sheńberinde etnopedagogıkalyq jáne ádebı muralaryn nasıhattaý maqsatynda júzege asyrylyp otyrǵan joba batyrdyń shyǵarmashylyǵyn dáripteý arqyly jastar boıyna otansúıgishtik rýh, patrıottyq sezim uıalatý, sonymen qatar mádenıet salasyndaǵy memlekettik saıasatty júzege asyrýǵa septigin tıgizedi», - deıdi S.Júzjanov.
