Malıdegi shıelenis: Qorǵanys mınıstri qaza taýyp, iri shaıqastar júrip jatyr
ASTANA. KAZINFORM – Malıde qarýly toptardyń jappaı shabýyldarynan keıin jaǵdaı kúrt ýshyǵyp, eldiń qorǵanys mınıstri Sadıo Kamaranyń qaza tapqany habarlandy, dep habarlaıdy Deutsche Welle.
Aqparatqa sáıkes, jarylys 26 sáýir kúni astana Bamakoǵa jaqyn Katı qalasynda bolǵan. Saldarynan Sadıo Kamara, onyń otbasy múshelerimen birge kóz jumǵan.
25 sáýirden bastalǵan qaqtyǵystar eldiń birneshe óńirinde, sonyń ishinde Gao, Sevare jáne Kıdal qalalarynda jalǵasyp jatyr. Bılik jaǵdaıdy baqylaýda ustap otyrǵanyn málimdegenimen, urys qımyldary toqtaǵan joq.
Shabýyldardy týareg kóterilisshileri men «ál-Kaıdamen» baılanysy bar JNIM toby birlesip jasaǵany aıtylýda. Sonymen qatar týaregterdiń Azavadty azat etý fronty Kıdal qalasyn baqylaýǵa alǵanyn málimdedi.
Keıbir derekterde Malıdegi reseılik kúshterdiń bir bóligi Kıdaldan shyǵarylǵany týraly aqparat tarady. Sondaı-aq resmı rastalmaǵan málimetter boıynsha, reseılik «Afrıka korpýsynyń» tikushaǵy atyp túsirilgen bolýy múmkin.
Eýropalyq odaq pen BUU Malıdegi shabýyldardy qatań aıyptady. Kaıa Kallas terrorızmge qarsy kúresti jalǵastyrýǵa daıyn ekenin málimdedi. Al Antonıý Gýterrısh óńirdegi qaýipsizdikti qamtamasyz etý úshin halyqaralyq qoldaýdy kúsheıtýge shaqyrdy.
Aıta keteıik, Malıde 2021 jyldan beri áskerı hýnta bılik júrgizip keledi. Elde qaýipsizdik jaǵdaıy áli de turaqsyz kúıde qalyp otyr.
