Malıde qarýly toptar jappaı shabýyl bastady
ASTANA. KAZINFORM – Malıde qarýly toptar eldiń birneshe óńirinde bir mezgilde úılestirilgen shabýyldar uıymdastyrdy, dep habarlaıdy BBC.
El astanasy Bamakoda jarylystar men atys daýystary estilgen. Áskerı bılik qaqtyǵystardyń jalǵasyp jatqanyn rastady.
– Qorǵanys jáne qaýipsizdik kúshteri qazirgi ýaqytta shabýyldyń betin qaıtarý jumystaryn júrgizip jatyr, – delingen resmı málimdemede.
Kýágerler Reuters agenttigine Katı áskerı bazasy mańynda jarylystar bolǵanyn jáne atys júrgenin aıtqan. Áskerıler bul aımaqta joldardy jaýyp tastaǵan.
Sondaı-aq eldiń soltústigindegi Gao men Kıdal qalalarynda, ortalyqtaǵy Sevare aýdanynda da qaqtyǵystar tirkelgen. Sarapshylar bul sońǵy jyldardaǵy eń iri shabýyldardyń biri bolýy múmkin ekenin aıtady.
AQSh elshiligi azamattaryna úılerinen shyqpaýǵa keńes berdi. Málimetterge sáıkes, Bamakodaǵy Modıbo Keıta halyqaralyq áýejaıy mańynda da jarylystar men atys bolǵan.
Malı áskeri jaǵdaı baqylaýda ekenin málimdegenimen, áleýmettik jelilerde taraǵan vıdeolar shabýyldarǵa Djamaat-nýsrat al-Islam val-mýslımın (JNIM) toby men Azavadty azat etý fronty (FLA) qatysy bolýy múmkin ekenin kórsetedi.
FLA ókili Mohamed Elmaýlýd Ramadan Kıdal qalasy kóterilisshilerdiń baqylaýyna ótkenin jáne olardyń yqpaly keńeıip jatqanyn málimdedi. Alaıda bul aqparat táýelsiz túrde rastalǵan joq.
Aıta keteıik, Malıde 2020 jylǵy tóńkeristen keıin bılikke kelgen general Assımı Goıta bastaǵan áskerı úkimet eldegi qaýipsizdikti turaqtandyrýǵa ýáde bergen bolatyn. Soǵan qaramastan, eldiń soltústigi men shyǵysynda jaǵdaı áli de turaqsyz kúıinde qalyp otyr.
Buǵan deıin Meksıkada týrısterge shabýyl jasalǵany málim boldy.
