Maldıv araldaryna týrıstik aǵyn artyp keledi: 2025 jyly jańa rekord ornaýy múmkin
ASTANA. KAZINFORM — Maldıv araldarynyń Valıýta basqarmasy 2025 jylǵa arnalǵan týrıstik kelýshiler sanynyń boljamyn rekordtyq 2,3 mıllıon adamǵa deıin arttyrdy, dep jazdy Sınhýa agenttigi memlekettik PSM News agenttigine silteme jasap.
Mamyr aıynda basqarma 2,2 mıllıon halyqaralyq týrıst keledi dep kútken bolatyn. Boljamnyń qaıta qaralýyna birinshi jartyjyldyqtaǵy joǵary kórsetkishter sebep boldy — týrısterdiń sany jyldyq eseppen 9,1%-ǵa artqan. Maýsym aıynyń sońyna deıin elge 1 108 130 týrıst kelgen.
Sonymen qatar, basqarma kelesi jyly — 2026 jyly — 2,4 mıllıon týrıst keledi dep boljap otyr.
Málimetterge sáıkes, jyl ortasyna deıin saıahattap kelgender sany 6 892 533-ke jetken, bul ótken jyldyń osy kezeńimen salystyrǵanda 1,2%-ǵa artyq.
Basqarma boljamnyń jańartylýyn qolaıly naryqtyq jaǵdaılarmen jáne ınfraqurylymnyń jaqsarýymen, atap aıtqanda Velana halyqaralyq áýejaıynda jańa jolaýshylar termınalynyń iske qosylýymen túsindiredi.
Eske sala keteıik, buǵan deıin Maldıv araldary Izraıl azamattaryna elge kirýge tyıym salǵanyn jazǵan edik.