Maldıv araldary týrıstik deklaratsııany toltyrý tártibin ózgertti
ASTANA. KAZINFORM — 2026 jylǵy 9 qarashadan bastap Maldıv araldarynda mindetti týrıstik IMUGA deklaratsııasyn rásimdeý tártibi ózgerdi. Endi saıahatshylar elektrondy poshta mekenjaıyn bir rettik kod arqyly rastaýy kerek, dep habarlaıdy Kazinform agenttigi TASS-qa silteme jasap.
Basylym Reseı týroperatorlary qaýymdastyǵyna silteme jasap, jańa talap barlyq sheteldik týrıstke, sonyń ishinde balalarǵa da qatysty ekenin habarlady.
Deklaratsııany toltyrý úshin IMUGA resmı saıtyna kirip, qoldanystaǵy elektrondy poshta mekenjaıyn kórsetý qajet. Odan keıin poshtaǵa kelgen bir rettik rastaý kodyn júıege engizý kerek. Osydan soń týrıst qajetti málimetterdi toltyryp, saýalnamany jibere alady.
Deklaratsııany Maldıv araldaryna kelmeı turyp, 96 saǵat ishinde toltyrý qajet. Bul rásim burynǵydaı tegin.
Náresteler úshin deklaratsııa toltyrǵan kezde ata-analar ózderiniń elektrondy poshta mekenjaıyn paıdalana alady. Saýalnamany jibergennen keıin saıahatshylarǵa berilgen QR-kodty saqtap qoıý qajet.
Jańartylǵan júıede saýalnamany toltyrý kezinde otbasy múshelerin nemese toptaǵy basqa adamdardy qosý múmkindigi paıda boldy. Alaıda ár týrıst úshin jeke deklaratsııa toltyrý talaby saqtalady.
Maldıv araldarynan qaıtar kezde deklaratsııany qaıta toltyrýdyń qajeti joq.
Qujatty Maldıv ımmıgratsııalyq qyzmetiniń resmı portalynda rásimdeýge bolady.
Eske salaıyq, buǵan deıin Maldıv parlamenti sheteldik týroperatorlardy, týrıstik agenttikterdi jáne onlaın brondaý platformalaryn Maldıvtiń ishki kiris basqarmasynda (MIRA) tirkelýge jáne týrıstik taýarlar men qyzmetter salyǵyn (TGST) tóleýge mindetteıtin zań jobasyn qabyldaǵanyn habarlaǵan edik.
