«Maldyń bári Ózbekstanǵa tirideı asyrylyp jatyr» - AShM túsinik berdi
ASTANA. KAZINFORM – Elimizden syrtqa mal satýǵa arnaıy kvota belgilengen. Sonyń aıasynda ár 6 aıda elden shyǵarylatyn maldyń naqty sany anyqtalady. Bul týraly Kazinform agenttigi joldaǵan saýalǵa Aýyl sharýashylyǵy mınıstrliginiń resmı jaýabynda aıtylǵan.
— 2024 jylǵy 26 qazannan 2025 jylǵy 26 sáýirge deıin «QR aýmaǵynan aýyl sharýashylyǵy janýarlaryn áketýdiń keıbir máselelerine» QR Aýyl sharýashylyǵy mınıstriniń buıryǵymen iri qara mal jáne usaq mal áketýge sandyq shekteýler (kvotalar) belgilendi: 12 aıdan asqan buqashyqtardyń eksportyna - 85 000 jáne 6 aıdan asqan erkek toqty sany - 120 000. Atalǵan kvota tetigi 2022 jyldan bastap iske asyrylyp keledi jáne 6 aı saıyn halyqaralyq ekonomıkalyq uıymdarǵa qatysý máseleleri jónindegi vedomstvoaralyq komıssııasynyń sheshimimen uzartylyp otyrady, - delingen habarlamada.
Mınıstrliktiń málimdeýinshe, osylaısha fermerlerdiń tirideı mal eksporttaý múmkindigi artyp otyr.
— Bul tetik - ishki naryqtyń qajettilikterin qanaǵattandyrýmen qatar, fermerlerdiń eksportqa shyǵý áleýetin saqtaýǵa múmkindik beretin teńgerimdi shara. 2024 jyldyń qorytyndysy bul tásilderdiń tıimdiligin kórsetti, ıaǵnı sıyr etiniń eksporty 1,5 esege ósip, 22,1 myń tonna boldy, sonyń ishinde Ózbekstanǵa eksport 20,7 myń tonnaǵa jetti, - delingen jaýapta.
Sonymen qatar, qazirgi tańda Ózbekstanǵa zańsyz mal asyrý máselesi de kún tártibinde tur. Buǵan deıin Kazinform tilshisine Ulttyq qaýipsizdik komıteti Shekara qyzmeti dırektorynyń orynbasary Tóleýjan Júnisov Ózbekstanǵa zańsyz ótkizilgen mal ári qaraı Tájikstan, Aýǵanstan, Pákistanǵa ketetinin aıtyp bergen bolatyn. Sebebi ol elderde baǵa aıyrmashylyǵy eki esege deıin barady.