Maldy sáıkestendirý júıesi eýropalyq talapqa kóshpek – AShM
ASTANA. KAZINFORM — Elimizde Eýroodaq talaptaryna sáıkes keletin úı janýarlaryn sáıkestendirýdiń biryńǵaı ortalyqtandyrylǵan júıege kóshýdi josparlap otyr. Bul týraly Aýyl sharýashylyǵy vıtse-mınıstri Ermek Kenjehanuly málim etti.

— Mınıstrlik veterınarııalyq júıe men bıologııalyq qaýipsizdikti damytýǵa erekshe nazar aýdarady. Birikken Ulttar Uıymynyń azyq-túlik jáne aýyl sharýashylyǵy uıymy bizdiń suraýymyzben aýyl sharýashylyǵy janýarlaryn sáıkestendirýdiń ulttyq júıesine baǵa berýde tehnıkalyq qoldaý kórsetti, ol úshin alǵys aıtamyz. Sonymen qatar halyqaralyq uıym eskirgen platformany jańǵyrtý boıynsha «Biryńǵaı ortalyqtandyrylǵan júıe» formatyna kóshirý boıynsha qundy usynystar berdi, bul onyń Eýroodaq talaptaryna sáıkestigin qamtamasyz etedi. Alaıda, usynystardy júzege asyrý úshin qosymsha tehnıkalyq qoldaý qajet, osyǵan baılanysty BUU-nyń azyq-túlik jáne aýyl sharýashylyǵy uıymy arqyly granttar tartý nemese donorlardy izdestirý jaǵyn qarastyrsaq, — dedi Ermek Kenjehanuly elordada ótip jatqan aýyl sharýashylyǵy salasyn damytýǵa arnalǵan dóńgelek ústel barysynda.
Mınıstr orynbasarynyń aıtýynsha, otandyq veterınarııalyq preparattar salasyna da tsıfrlyq baqylaý júıesin engizý qajet.
— Osy oraıda BUU-nyń azyq-túlik jáne aýyl sharýashylyǵy uıymy bıýrosymen birlesip, dúnıejúzilik saýda uıymynyń saýda standarttary men damý qory (STDF) aıasynda granttyq qarjylandyrý alý úshin ótinim ázirlenip, jiberildi. Biz bul bastamamyzdyń qoldaý tabatynyna úmittimiz. Qazaqstan BUU-nyń azyq-túlik jáne aýyl sharýashylyǵy uıymymen veterınarııalyq baqylaý salasyna halyqaralyq standarttardy engizý, mamandardyń biliktiligin arttyrý, sondaı-aq mal sharýashylyǵynda aýrýlardyń taralýyn boldyrmaý jáne baqylaý boıynsha birlesken sharalardy ázirleý baǵytynda jumysty jalǵastyrýǵa daıyn. Qazirdiń ózinde BUU-nyń azyq-túlik jáne aýyl sharýashylyǵy uıymynyń tehnıkalyq qoldaýymen elimizde «Bir densaýlyq» tujyrymdamasy aıasynda veterınarııa salasynda úsh joba júzege asyrylyp jatyr, — dep tolyqtyrdy spıker.
Buǵan deıin habarlaǵanymyzdaı elimizde aýyl sharýashylyǵy ónimderin qaıta óńdeýdi damytýdyń keshendi jospary qabyldandy.
Aıta keteıik, byltyr aýyl sharýashylyǵy ónimderi kólemi 13,7%-ǵa artyp, sala úshin rekordtyq maýsym boldy.