Malaızııalyq jelaıaq áıel «Uly Jibek joly» sharasy aıasynda Almaty qalasy boıynsha júgirip ótedi

Bul týraly búgin, 12 sáýirde Almatydaǵy Halyqaralyq aqparattyq tehnologııalar ýnıversıteti baspasóz qyzmetiniń jetekshisi Maırash Taıkenova aıtty.

Onyń sózine qaraǵanda, malaızııalyq jelaıaq Almatyǵa búgin ushyp keledi. Naqty ýaqyty ázirge belgisiz. Al sharany uıymdastyrýshylar Almatydaǵy Malaızııa elshiliginiń konsýly men Halyqaralyq aqparattyq tehnologııalar ýnıversıteti.

Al «Uly Jibek joly» sharasy aıasyndaǵy júgiristi Sýýaıba Mohd Nasır ózi oılap taýyp, ózi júzege asyryp jatyr. Qytaıdyń Beıjiń qalasynan bastalǵan júgirý Italııanyń Venetsııa qalasynda aıaqtalady.

Sýýaıba Mohd Nasır búgin Almaty qalasynda shamamen tańǵy saǵat 11:00-de Halyqaralyq aqparattyq tehnologııalar ýıversıtetiniń aldynan jolǵa shyǵady. Júgirý baǵyty: Sátbaev kóshesi - Seıfýllın dańǵyly - Ál-Farabı dańǵyly - Saın dańǵyly - Raıymbek dańǵyly. Odan keıingi baǵyt - Qordaı kenti.

Jelaıaqpen birge qala ishinde ýnıversıtet stýdentteri, oqytýshylary jáne rektory júgirýge bel býyp otyr.

Uıymdastyrýshylardyń aıtýynsha, Sýýaıba Mohd Nasır kúnine 50 shaqyrymnan júgirip otyrady. Ara-arasynda demalady, keıbir jerlerde kólikti paıdalanady.

«Jelaıaqqa ilesip jıyrma adam kólikpen júrip otyrady. Olardyń ishinde dárigerler, basqa da qajetti mamandar bar. Jospar boıynsha Sýýaıba Mohd Nasır Bishkek qalasynan keıin Taraz, Shymkent qalalary arqyly da júgirip ótedi» - dedi Maırash Taıkenova.

Odan keıingi baǵyt Tashkent, Samarqand, Buhara qalalary arqyly ótedi. Sońǵy núkte - Italııanyń Venetsııa qalasy.