Malaızııalyq ushaq apatynan qaza tapqandardyń máıitteri Nıderlandyǵa jetkizile bastaıdy
ASTANA. QazAqparat - Malaysia Airlines avıakompanııasynyń «Boıng» ushaǵynyń Ýkraına shyǵysyndaǵy apaty kezinde qaza tapqandardyń deneleri taný úshin sársenbi kúni Nıderlandyǵa jetkizile bastaıdy. Laınerdiń «qara jáshikteri» aǵylshyndyq Farnboro qalasyna jetkizildi, dep habarlady Bı-bı-sı.
Marqumdardyń múrdesin tasıtyn alǵashqy ushaq Nıderlandynyń Eındhoven qalasynyń áýejaıyna jergilikti ýaqyt boıynsha saǵat 16.00-de kelýi tıis. Munyń aldynda Harkovte qaraly rásim ótip, qatysýshylar qaza tapqandardy bir mınýt únsizdikpen eske aldy. Nıderlandy úkimetiniń ókili Lodeveıka Hekkıngtiń aıtýynsha, 60-qa jýyq tabyt eki ushaqpen Eındhovenge jetkizildi.
Bı-bı-sı tilshisi Denıel Sendford habarlaǵandaı, Harkov áýejaıyna jetkiziletin apat qurbandarynyń denesi kádimgi aǵash tabyttarǵa salyndy. Qazir mamandar laıner bortynda bolǵan 298 adamnyń tek 200-iniń ǵana máıitin tanydy. Eındhovende marqumdardyń denelerin gollandyq koroldik otbasy músheleri men Nıderlandy premer-mınıstri Mark Rıýtte kútip alady. Máıitter tanylý úshin Hılversým qalasyna jetkiziledi. Rıýtteniń aıtýynsha, bul jumystar birneshe aıǵa sozylýy múmkin. Avstralııanyń premer-mınıstri Tonı Ebbottyń aıtýynsha, ázirge Harkov qalasyna qansha múrdeniń jetkizilgeni, qanshasy apat ornynda qalǵany belgisiz. «Kóptegen múrdeler áli ashyq jerlerde jatýy ábden múmkin. Olar ystyqtan búlinip nemese jabaıy ańdarǵa jemtik bolýy da múmkin», - dedi Kanberradaǵy baspasóz máslıhatynda Ebbott. Budan buryn Malaızııa ókilderi apatqa ushyraǵan ushaqtyń «qara jáshigin» Nıderlandynyń tergeýshilerine bergen. Olar ony brıtandyq Farnboro qalasyndaǵy avatsııalyq oqıǵalardy tergeý bólimine jiberdi. Brıtandyq mamandar alǵan «qara jáshikterdegi» derekter keıinnen gollandııalyq jáne ýkraındyq sarapshylarǵa tapsyrylady. Farnboro sarapshylarynda ushqyshtar kabınasynda qaıǵyly oqıǵa aldyndaǵy sońǵy sátterde bolǵan jaıttardy anyqtaýǵa múmkindik beretin tehnıka bar.
