Malaızııalyq dıplomdy endi Túrkistanda alýǵa bolady
TÚRKІSTAN. QazAqparat - Malaızııalyq dıplomdy endi Túrkistanda alýǵa bolady. Atalǵan eldiń Taylor's ýnıversıteti Túrkistanda bilim alatyn stýdentter úshin arnaıy oqý baǵdarlamasyn jasap, óz dıplomyn bermek. Bul kelisim Kýala-Lýmpýrda ótken halyqaralyq bıznes-forým aıasynda Túrkistan delegatsııasy men Taylor's University basshylyǵy arasynda jasaldy, dep habarlaıdy QazAqparat tilshisi.
«Túrkistan» ÁKK» AQ fılıaly «Turkistan Invest» kompanııasy baspasóz qyzmetiniń málimetinshe, forým túrkistandyq delegattardyń Malaızııaǵa jasaǵan roýd-shoýy barysynda ótti. Malaızııa ýnıversıtetiniń baǵdarlamasy Túrkistan oblysynda qurylysy bıyl bastalǵaly jatqan Halyqaralyq týrızm jáne servıstik qyzmet kolledji stýdentteriniń oqý baǵdarlamasyna engiziledi. Onda halyqaralyq deńgeıdegi bilimdi týrızm jáne servıstik qyzmet salasyndaǵy bolashaq mamandar alady.
«Dýaldy oqytý júıesinde birden eki dıplom alýǵa bolady. ıAǵnı, Halyqaralyq kolledj túlekteri oqýdy támamdaǵanda atalmysh kolledjdiń dıplomyn jáne Taylor's ýnıversıtetiniń dıplomyn ıelenedi. Bul tek Qazaqstanda ǵana emes, shetelde de jumys tabýǵa erekshe múmkindik beredi»,- dedi Túrkistan oblysynyń týrızm jáne syrtqy baılanystar basqarmasy bastyǵynyń orynbasary Jasulan Túlebekov.
Qazirgi ýaqytta taraptar áriptestiktiń egjeı-tegjeıin talqylap jatyr.
«Kelissóz barysynda malaızııalyq bıznes ókilderi týrızm salasyna ınvestıtsııa salýǵa qyzyǵýshylyq tanytty. Atap aıtqanda, Túrkistanda qonaqúıler men hostelder salý múmkindigi talqylandy. Malaızııanyń álemde týrızm boıynsha kóshbasshy elder qatarynda ekeni belgili, sondyqtan, biz óz tarapymyzdan ekijaqty tıimdi yntymaqtastyq qurý maqsatynda barynsha qoldaý kórsetip, jaǵdaı jasaımyz», - dedi «Túrkistan» ÁKK» AQ fılıaly «Turkistan Invest» syrtqy baılanystar jónindegi basqarýshy dırektory Baıan Kaıýpova.
Aıta keteıik, halyqaralyq bıznes-forýmǵa 100-den astam iri malazııalyq týroperatorlar men kásipkerler qatysty. Túrkistandyq delegatsııanyń ókilderi is-shara qatysýshylaryna Túrkistan oblysynyń týrıstik múmkindikterin tanystyrdy. Onda óńirdiń tarıhı-mádenı muralary men nysandary, emdeý-saýyqtyrý oryndary, qysqa merzimdi týrlar, jańa qyzyqty marshrýttar, qonaqúıler, demalys aımaqtary, ınfraqurylym men servıstik qyzmettiń damýy, júzege asyp jatqan ınvestıtsııalyq jobalar kórsetildi. Tanystyrylymdardan keıin ekijaqty V2V formatynda kezdesýler ótti.
