Malaızııalyq «Boıng» ushaǵynyń qara jáshigin taldaý shtattan tys jaǵdaıdy anyqtaǵan joq
ASTANA. QazAqparat - Ýkraınanyń shyǵysynda apatqa ushyraǵan malaızııalyq «Boıng» ushaǵy ekıpajynyń sózderin tirkeıtin qara jáshikti aldyn ala taldaý apat aldynda shtattan tys jaǵdaı bolmaǵanyn anyqtady, dep jazady RBK The New Sunday Times-ke silteme jasap.
Halyqaralyq tekserý barysymen tanys derekkózdiń habarlaýynsha, Ulybrıtanııanyń avıatsııalyq oqıǵalardy tekserý basqarmasy Boeing 777 ushqyshy men ekıpajdyń anyqtalmaǵan múshesiniń dıspetchermen sózderin zerdeledi.
«Komanda (apatty tekserý boıynsha) estigen sózderde onda («Boıng» bortynda) ádetten tys eshteńe bolmaǵan. (Tirkeý quralynda) estilgen sońǵy daýys ushqyshtiki emes. Ushqyshtar baıqaǵan ádetten tys eshteńe bolmaǵan», - dedi basylym suhbattasýshysy.
Derekkóz Boeing 777 apatynyń sebepteri týraly alǵashqy naqty qorytyndylar kelesi aptada jarııalanatynyn qosty.
Amsterdamnan Kýala-Lýmpýrǵa MN17 reısin oryndaǵan Malaızııa avıajelileriniń Boeing 777 ushaǵy 17 shildede keshke apatqa ushyrady. Laıner Donetsk oblysynyń Shahter aýdanyndaǵy Grabovo selosy mańyna qulady. Borttaǵy 298 adamnyń bári qaza tapty. Apat qurbandarynyń kópshiligi - Nıderlandy azamattary.
BUU-nyń adam quqyqtary jónindegi Joǵarǵy komıssary Navı Pılleı ushaqty qurtý áskerı qylmys dep sanaýdy usyndy.
AQSh «Boıng» ushaǵynyń apatqa ushyraýyna ózin-ózi jarııalaǵan Donetsk halyqtyq respýblıkasynyń jasaqshylaryn resmı aıyptap otyr. «Biz «Malaızııa avıajelileriniń» ushaǵy jerden zymyranmen atyp túsirilgenin bilemiz. Biz ol separatıster baqylap otyrǵan aýmaqtan ushyrylǵanyn bilemiz, sol sátte ýkraındyq Áýe shabýylynan qorǵanys júıesi jumys jasaǵan joq», - dep málimdedi 26 shildede Aq úıdiń resmı ókili Djosh Ernest.
Onyń aıtýynsha, bul qaıǵyly oqıǵaǵa Reseı jáne el prezıdenti Vladımır Pýtın tikeleı qatysty. «Biz Reseı tarapynan Ýkraınaǵa aýyr qarý-jaraqtar jetkizilgenin kórdik, olardy keıinnen Reseı qalaı paıdalanýdy úıretker separatıster paıdalandy. Bul qarý-jaraqtardyń arasynda Áýe shabýylynan qorǵaný quraldary da boldy. Áleýmettik jelilerdegi habarlarǵa qaraǵanda, onda SA-11 keshenderi («Býk» dep atalatyn) bolǵan. Biz endi bul qaıǵyly oqıǵaǵa Vladımır Pýtın men orystar kináli degen qorytyndy jasaımyz», - dedi Ernest.
Reseı taraby ushaqtyń apatqa ushyrý sebepterin aıtýǵa erterek dep atap ótti jáne halyqaralyq tekserý qorytyndysyn kútýdi usyndy. Qorǵanys mınıstrligi 21 shildede reseılik naqty baqylaý quraldarynyń baıqaýlary málimetterin jarııalady. Olar 17 shildede Malaysia Airlines avıakompanııasynyń Boeing 777 jolaýshylar ushaǵynyń mańynda ýkraın ÁÁK shabýylshy ushaǵy bolǵanyn tirkegen. Aldyn ala málimet boıynsha Sý-25 ushaǵy malaızııalyq laıner jaqqa ushyp bara jatqan, dep habarlady brıfıngide RF Qarýly kúshteri Bas shtabynyń bas jedel basqarý basqarmasynyń bastyǵy, general-leıtenant Andreı Kartapolov.
«Ýkraına ÁÁK ushaǵy bıiktep bara jatqany tirkeldi, onyń malaızııalyq Boeing ushaǵynan araqashyqtyǵy 3-5 shaqyrymdaı», dep qosty Kartapolov. Ol ýkraın áskerı ushaǵy nege azamattyq kemeler trassasymen ushady, dedi.
Qorǵanys vedomstvosynyń ókili ýkraın armııasynda ushaq qulaǵan aýdan ÁShQ quraldarymen jaraqtanǵany týraly Reseıde ǵaryshtyq sýretter bar ekenin aıtty.
Ushaqtyń apatqa ushyraýynyń sebepteri týraly resmı nusqa ázirshe jarııalanǵan joq, alaıda 27 shildede amerıkandyq CBS telearnasy tekserý sharalaryna jaqyn derekkózge silteme jasap, laınerdiń zymyrannyń kóptegen jarqynshaqtarymen búlingenin habarlady.
