Malaızııalyq «Boıng-777» ushaǵy apatyn tergeý qorytyndylary jarııalandy
ASTANA. QazAqparat - «Malaızııa áýe joldary» jolaýshylar ushaǵynyń Ýkraınada apatqa ushyraý sebebin anyqtap jatqan halyqaralyq tergeý toby baspasóz konferentsııasynda laınerdi Pervomaıskoe jáne Snejnoe aýyldarynan ushyrylǵan zymyrannyń atyp túsirgenin habarlady.
Bul týraly Bı-bı-sı jazady.
Aıǵaq retinde tergeý toby fotosýretter, beınejazbalar, dıalogtardyń aýdıojazbasyn kórsetti jáne ushýdy modeldep, úsh ólshemdi karta arqyly ushaqtyń apat bolýyn kórsetti.
Sonymen birge, tergeýshiler «Býk» kolonnasynyń júrý baǵytyn egjeı-tegjeıli sıpattap berdi. Olardyń habarlaýynsha, ushaqtyń apatyna sebepker bolǵan «Býk» ushyrý qondyrǵysy Reseıden Ýkraınaǵa jetkizilgen.
Reseı qorǵanys mınıstrligi ushaq apatyna qandaı da bir qatysy baryn joqqa shyǵarýda jáne óz nusqalaryn aıtýda. Baspasóz konferentsııasy bastalmaı turyp, Kreml baspasóz hatshysy Dmıtrıı Peskov jýrnalısterge ózin-ózi jarııalaǵan Donetsk halyq respýblıkasy ókilderiniń ushaqty atyp túsirýi múmkin emes ekenin málimdedi.
«Reseılik tarap bul qaıǵyly oqıǵanyń ádil jáne tolyq tergelýin qoldaıdy jáne qoldap keledi. Apat týraly alýan túrli kózqarastar bar, olardyń biri sarapshylyq, tipti bultartpas aıǵaqtar da bar. Sózsiz, bizdiń áskerıler jarııalaǵan sońǵy aqparatty - atalǵan aýmaqta ushýy múmkin barlyq ushý apparattary men nysandardy túsirip alǵan bastapqy radar derekterin de eskere otyryp qorytyndy jasaǵan jón», - degen Dmıtrıı Peskovtyń sózin keltiredi RIA Novostı.
2014 jyldyń shilde aıynda Amsterdamnan Kýala-Lýmpýrge bet alǵan «Malaızııa áýe joldarynyń» "Boıng-777" ushaǵy Ýkraınanyń ońtústik-shyǵysynda opat boldy. Bortta bolǵan barlyq 298 adam mert bolǵan edi.
