Malaızııalyq áýe kompanııasy Qazaqstanǵa jańa reıster ashady
QR Prezıdentiniń tapsyrmasymen QR Indýstrııa jáne ınfraqurylymdyq damý mınıstrligi jańa halyqaralyq baǵyttardy ashý jáne jańa sheteldik áýe kompanııalaryn tartý boıynsha belsendi jumys júrgizip jatyr. Osy tapsyrma negizinde Kýala-Lýmpýr qalasynda (Malaızııa) QR IIDM Azamattyq avıatsııa komıteti, QR-nyń Malaızııadaǵy elshiligi, Nur-Sultan, Almaty, Qaraǵandy qalalary áýejaılary men «Eır Astana» áýe kompanııasy ókilderi bar qazaqstandyq delegatsııa Air Asia kompanııasynyń ókilderimen kezdesken. Malaızııa tarapynan «Air Asia» kompanııasynyń negizin qalaýshy Datýk Kamarýdın bın Meranýn jáne AirAsia áýe kompanııasynyń atqarýshy dırektory Benıamın Ismaıl kelissóz júrgizdi.
Air Asia - Azııadaǵy iri jáne álemdegi 13-shi bıýdjettik áýe kompanııa.
«Kelissóz barysynda taraptar Qazaqstan men Malaızııa arasynda «Air Asia» áýe kompanııasynyń tikeleı áýe qatynasyn ashý múmkindigin talqylady. Malaızııa tarapyna álemdik iri qarjy ortalyqtaryna Qazaqstan arqyly 5-shi áýe erkindigi bar Nur-Sultan, Almaty, Qaraǵandy áýejaılaryna ushý múmkindigi usynyldy. «Ashyq aspan» rejimi Nur-Sultan, Almaty, Qaraǵandy, Shymkent, Óskemen, Pavlodar, Kókshetaý, Taraz, Petropavl, Semeı qalalarynyń áýejaılaryna taralady», - dep habarlaıdy komıtetten.
Sonymen qatar, otandyq áýejaılar ókilderi turaqty reısterdiń ashylýyn yntalandyratyn túrli tetikterdi usyndy. Óz kezeginde Datýk Kamarýdın bın Meranýn Eýropanyń Rım, Mılan, Nıtstsa qalalaryna jáne Nıý-Iork qalalary boıynsha áýe erkindigi bar Almaty qalasyna tikeleı reıs ashýǵa qyzyǵýshylyq bildirdi.
Sondaı-aq, Malaızııanyń Kólik mınıstrligi Azamattyq avıatsııa departamentiniń basshysy - memlekettik hatshy Mohamad Radzýan Mazlanmen kezdesý ótti. Kelissóz barysynda malaızııalyq áýe kompanııalarymen, sonyń ishinde Air Asia-men áýe qatynasyn keńeıtý máseleleri talqylandy.
Malaızııanyń avıatsııa bıligi Qazaqstannyń eki el arasynda jańa reısterdi ashý jónindegi bastamasyna tolyq qoldaý bildirdi.
