Malaızııalyq Air Asia ushaǵy Belıtýng araly mańyndaǵy sýǵa qulaǵan
ASTANA. QazAqparat - Malaızııalyq áýe kompanııasynyń Air Asia ushaǵy aýa raıynyń qolaısyzdyǵy saldarynan Belıtýng aralynyń mańyndaǵy sýǵa qulaǵan, dep habarlaıdy jergilikti BAQ.
Budan buryn habarlaǵanymyzdaı, áýe dıspetcherlik qyzmeti Malaızııanyń Air Asia áýe kompanııasynyń ındonezııalyq Sýrabaıa qalasynan Sıngapýrge ushyp shyqqan ushaǵymen baılanysty joǵaltyp alǵan. Djakartanyń komandalyq-dıspetcherlik pýnkti men QZ 8501 reısi arasyndaǵy baılanys jergilikti ýaqyt boıynsha saǵat 06.17-de úzildi.
Indonezııanyń Kólik mınıstrligi ókiliniń aıtýynsha, baılanys úzilmesten sál ýaqyt buryn ushaqtyń ushqyshtary baǵyttaryn ózgertip ushýǵa ruqsat etýdi suraǵan, dep jazady RIA Novostı.
Keıbir BAQ-tyń málimetterinshe, áýe kóliginiń ishinde 162 adam bolǵan. Al Indonezııanyń Kólik mınıstrligi onyń bortynda 155 adamnyń bolǵandyǵy týraly habarlaıdy. «Streıts taıms» gazetiniń elektrondyq nusqasyndaǵy málimetterge súıensek, olardyń arasynda Koreıa Respýblıkasynyń úsh azamaty, bir sıngapýrlyq azamat jáne Ulybrıtanııanyń bir turǵyny bolǵan, qalǵandary - Indonezııanyń azamattary.
