Malaızııalyq kompanııanyń máselesi oń sheshiledi dep úmittenemin — bıznes-ombýdsmen

ASTANA.KAZINFORM — 13 naýryzda Qazaqstan kásipkerleriniń quqyqtaryn qorǵaý jónindegi ýákil Qanat Nurov baspasóz konferentsııasynda sóz sóıledi. Bul konferentsııany malaızııalyq kompanııa ókilderi «Qazaqstan Ǵarysh Sapary» AQ tarapynan ınvestıtsııalyq kelisimsharttyń birjaqty buzylýyna qatysty jaǵdaıdy baıandaý maqsatynda uıymdastyrǵan.

2018 jyly malaızııalyq ınvestor Astanada 14,5 gektar jer teliminde aýqymdy qurylys jobasyna qatysýǵa shaqyryldy. Investor 96 mlrd teńge salýǵa mindettenip, onyń 20 mlrd teńgesin ınvestıtsııalaǵan.

Joba aıasynda turǵyn úı keshenderi men Massachýsets tehnologııalyq ınstıtýty jáne Kembrıdj ýnıversıtetimen áriptestik ornatqan halyqaralyq mektep salyndy.

Spıkerlerdiń málimetinshe, tek 1,6 mlrd teńge ınjenerlik kommýnıkatsııalarǵa, ıaǵnı turǵyn úıler men mektepti sý qubyryna, jylý júıesine jáne elektr energııasyna qosýǵa jumsalǵan.

Alaıda, 2024 jyldyń aqpanynda «Qazaqstan Ǵarysh Sapary» AQ kútpegen jerden kelisimshartty buzdy. Olar muny ınvestordyń 700 myń teńge kólemindegi eki aptaǵa keshiktirilgen qaryzymen túsindirdi. Alaıda bul qaryz kelisimshart buzylǵanǵa deıin ótelgen.

Qanat Nurov bul isti zerttegennen keıin Bas prokýratýraǵa Joǵarǵy sotqa kassatsııalyq narazylyq engizý týraly ótinish joldaǵanyn aıtty. Bul kelisimsharttyń buzylý zańdylyǵyn qarastyryp, ınvestıtsııalyq klımatqa áserin baǵalaýǵa múmkindik beredi.

- Malaızııalyq kompanııa sáttilikke jetedi dep úmittenemin jáne bizdiń quqyqtyq júıemiz ádil sheshim shyǵarady dep senemin, – dedi Qanat Nurov.

Aıta ketelik  5 jylda geologııalyq barlaý jumystaryna 12 mlrd teńge shetel ınvestıtsııasy tartyldy.