Malaızııada musylmandardyń birligi týraly deklaratsııa talqylanyp jatyr
ASTANA. 30 jeltoqsan. QazAqparat - Malaızııadaǵy «Ádiletti ómirdi jaqtaıtyn halyqaralyq qozǵalys» atty úkimettik emes uıymǵa jetekshilik etetin belgili ǵalym ári qoǵam qaıratkeri Shandra Muzafar el bıligi men múftııatyna álem musylmandaryn biriktiretin ǵylymı-dinı negizi bar «Amman deklaratsııasyn» resmı túrde maquldaýǵa shaqyrdy.
Atalmysh deklaratsııaǵa 2005 jyly Ammanda ótken konferentsııada álemniń elý eliniń betke ustar eki júz musylman ǵalymy qoldaryn qoıyp, batasyn bergen bolatyn. Sol jyldyń qysynda atalmysh qujat Mekkedegi Islam Yntymaqtastyq Uıymynyń májilisinde maquldandy. Bul týraly muslim.kz saıty jazady.
Atalmysh qujatta súnnetti ustanatyn musylmandardyń tórt mázhaby da, shııtter baǵyty da, sopylyq ta, sondaı-aq, sálafshylardyń baǵyt-baǵdary da maquldanǵan bolatyn. Buǵan qosa, deklaratsııada pátýa qabyldaýdyń jón-josyǵy da qarastyrylǵan. Dese de, deklaratsııada asyl dinimizge qaıshy keletin tákbirlikke qatań tyıym salynǵanyn aıta ketý kerek.
«Shandra Muzafar Malaızııa bıliginen «Amman deklaratsııasyn» moıyndap qana qoımaı, ony ıslamı bilim berý ortalyqtaryna taratýdy jáne juma ýaǵyzynda keńinen nasıhattaýdy talap etip otyr.
Sońǵy ýaqytta súnnetti ustanatyndar men shııtter arasyndaǵy teketirestiń Taıaý Shyǵystyń «bas aýrýyna» aınalǵanyn, sondaı-aq osynaý jat qubylystyń túkpirde jatqan sonaý Malaızııaǵa da jetkenin aıta ketý kerek», - dep jazady Ázirtet Sultan meshitiniń resmı saıty.
