Malaızııada qalyń tútin saldarynan mektepter jabylyp jatyr
ASTANA. KAZINFORM – Malaızııada aýanyń qatty lastanýyna baılanysty ýaqytsha jabylǵan mektepter sany artyp jatyr. Shekteýler eldiń birneshe óńirin, sonyń ishinde astana Kýala-Lýmpýr men ákimshilik ortalyq Pýtradjaııany qamtydy, dep habarlaıdy Sınhýa.
Eldiń Bilim mınıstrligi málimetinshe, aýa sapasynyń ındeksi (API) 180 kórsetkishinen asqan aýdandardaǵy mektepter 10 qazannan bastap jabylǵan.
Al aýa sapasynyń ındeksi úsh kún qatarynan 150-den joǵary bolǵan óńirlerde oqý oryndary 12 qazannan bastap jumysyn ýaqytsha toqtatady.
Ulttyq monıtorıng júıesiniń deregine sáıkes, Malaızııa túbeginiń basym bóliginde aýanyń lastaný deńgeıi adam densaýlyǵyna zııandy kórsetkishke jetken. Ásirese eldiń batys jaǵalaýyndaǵy Selangor, Djohor jáne Negerı-Sembılan shtattarynda jaǵdaı kúrdeli.
– Aýa sapasynyń ındeksi 0-den 50-ge deıin bolsa, jaqsy, 51-den 100-ge deıin ortasha dep esepteledi. 101-den 200-ge deıingi kórsetkish densaýlyqqa zııandy, 201-den 300-ge deıin óte zııandy, al 301-den joǵary kórsetkish qaýipti sanalady, – dep túsindirdi jaýapty vedomstvo.
Mamandardyń málimetinshe, eldegi qalyń tútinge Indonezııa aýmaǵyndaǵy orman jáne shymtezek órtteri sebep bolǵan.
Aıta keteıik, buǵan deıin Malaızııanyń Borneo aralyndaǵy Serıan qalasynda aýa sapasynyń ındeksi 521-ge jetip, qaýipti tútin saldarynan tótenshe jaǵdaı jarııalanǵan bolatyn.
