Malaızııada Azııa elderindegi qazaqtardyń tuńǵysh quryltaıy ótti
ASTANA. KAZINFORM – 11-12 qarasha aralyǵynda Malaızııanyń Kýala-Lýmpýr qalasynda Ońtústik-Shyǵys Azııa elderindegi qazaqtardyń tuńǵysh quryltaıy ótti. Quryltaıǵa Malaızııa, Koreıa, Sıngapýr elderinen 100 ge jýyq otandastarymyz qatysty. Shara «Otandastar qory» KeAQ, Malaızııadaǵy qazaq qaýymdastyǵynyń uıymdastyrýymen, Qazaqstan Respýblıkasynyń Malaızııadaǵy Elshiliginiń qoldaýymen ótti. Bul týraly oordyń baspasóz qyzmeti habarlady.
Quryltaıdyń ashylýynan bastap, ár plenarlyq otyrystarynda Qazaqstan men sheteldegi qazaqtardyń mádenı, ekonomıkalyq jáne rýhanı yntymaqtastyǵyn nyǵaıtýǵa baǵyttalǵan túrli máseleler keńinen talqylandy. Atap aıtqanda, ashylý saltanatynda Qazaqstannyń Malaızııadaǵy elshisi Bolat Súgirbaev, "Otandastar qorynyń" KeAQ prezıdenti Danııar Qadyrov jáne Malaızııadaǵy qazaq dıasporasynyń prezıdenti Baıan Nıshan sóz sóıledi.
Elshi Bolat Súgirbaev, quryltaıdyń ashylý saltanatynda sóz sóılep, sheteldegi qazaq dıasporasymen mádenı jáne ekonomıkalyq baılanystardy nyǵaıtý qajettigin atap ótti. Ol quryltaıdyń mańyzdylyǵyn, onyń Qazaqstan men Malaızııa arasyndaǵy yntymaqtastyqty kúsheıtýge baǵyttalǵanyn túsindirdi.
Qoǵam prezıdenti Danııar Qadyrov, quryltaıdyń basty maqsaty sheteldegi qandastarmen baılanysty arttyryp, birlikti nyǵaıtý ekenin aıtty. Ol «Otandastar qory» atynan atqarylyp jatqan jumystardy baıandap, Qazaqstannyń álemdik deńgeıde tanylýy jolyndaǵy mádenı bastamalardyń mańyzdylyǵyna toqtaldy.
Malaızııadaǵy qazaq dıasporasynyń prezıdenti Baıan Nıshan ashylý sózinde sheteldegi qandastarmen mádenı jáne ekonomıkalyq yntymaqtastyqty damytýdyń mańyzyn erekshe atap ótip, Quryltaıdyń ortaq múddeni kózdeıtin bastama ekenin aıtty.
Quryltaıdyń mádenıetke qatysty otyrysynda qazaq tili men salt-dástúrlerin shetelde saqtaý men damytý taqyryby keńinen talqylandy. Qoǵamnyń Sheteldegi otandastarmen jumys departamentiniń basqarýshy dırektory Laýra Bolatova qazaq tilin, ulttyq salt-dástúrdi saqtaý jáne bolashaq urpaqqa mura etý baǵytyndaǵy Qoǵam tarapynan jasalyp jatyqan jobalarymen bólisti. Baıandama shetelde ulttyq qundylyqtarymyzdyń mańyzdylyǵyn arttyrýǵa arnalǵan jobalardy qamtydy.
Quryltaıda Malaızııadaǵy Halyqaralyq Islam Ýnıversıtetiniń doktoranty Anar Rysmuhambetova «Malaızııadaǵy qazaq dástúrleri men mádenıetin qoldaý» taqyrybynda sóz sóılep, qazaq mádenıetin shetelde nasıhattaý men saqtaýdyń ózektiligine toqtaldy. Ol Malaızııadaǵy qazaq qaýymdastyǵynyń ulttyq qundylyqtaryn saqtap, urpaqtan-urpaqqa jetkizý baǵytynda atqaryp jatqan jumystary jaıly baıandap, bul bastamalardyń sheteldegi qazaq jastarynyń ulttyq biregeıligin saqtaýǵa septigin tıgizetinin aıtty.
Anar Rysmuhambetova qazaq mádenıeti men dástúrlerin qoldaýdyń mańyzyn aıta kele, qazaq dıasporasyna arnalǵan mádenı jobalardy uıymdastyrýdyń jáne jastarǵa ulttyq qundylyqtardy dáripteýdiń qajettiligin erekshe atap ótti.
